Tusaýkeser kezdesýinde úndistandyq Hampı Konerýdi (FIDE reıtınginde 7-orynda) qapy qaldyrǵan Bıbisara (№6) ekinshi týrda Qytaı sheberi Chjý Szınermen (№4) teń tústi. Jarys erejesine saı klassıkalyq shahmattan ótken ár básekeden soń jeńimpaz mindetti túrde anyqtalýǵa tıis. Sol sebepti «armageddon» formatymen qosymsha partııa oınalyp, bul básekede jerlesimiz basymdyq tanytty.
Úshinshi týrda B.Asaýbaeva 20 jastaǵy Dıvıa Deshmýkhpen (№11) kezdesti. Kezinde jasóspirimder men jastar arasyndaǵy jarystarda jasyndaı jarqyldap, álemdik dodalarda san márte altynnan alqa taqqan Úndistannyń asa daryndy shahmatshysy eresekter dodasynda da óziniń myqtylyǵyn moıyndatyp úlgerdi. Dıvıa – Azııa chempıony, shahmatshylar Olımpıadasynyń jeńimpazy. Bul saıysta da teń esep tirkeldi.
«Armageddonda» da jeńimpaz anyqtalmady. Ondaı jaǵdaıda jeńis qara fıgýralarmen oınaǵan oıynshyǵa beriletini belgili. Bul rette Deshmýhtyń baǵy jandy.
Tórtinshi kezdesýin Bıbisara Szıýı Venszıýnge (№3) qarsy ótkizdi. 2018 jyly álem chempıony atanǵan 35 jastaǵy Qytaı shahmatshysy áli de tuǵyrdan taıǵan joq. Sońǵy segiz jyl aralyǵynda óz ataǵyn bes márte sátti qorǵady. Komandalyq álem chempıonaty men shahmatshylar Olımpıadasynda eki ret dara shyqty. Mine, osyndaı ataǵy jer jarǵan has sheberdi B.Asaýbaeva «armageddonda» utty.
Besinshi týrda bári kerisinshe boldy. Bıbisara ýkraınalyq Anna Mýzychýktan qosymsha partııada utyldy. Osy sátsizdikten keıin Dıvıa Deshmýkhty alǵa jiberip, ekinshi orynǵa syrǵyp tústi. Kóp keshikpeı Bıbisara qaıta kósh bastady. Ekinshi kezeńdegi alǵashqy básekesinde ol Hampı Konerýdi taǵy da utty. Bul joly «armageddonda» aılasyn asyrdy. Qazir qazaq grossmeısteriniń qorjynynda 9,5 upaı bar. Ekinshi oryndaǵy Dıvıa Deshmýkhtyń odan bir upaıy kem.
