Saltanatty rásimge oblystyq máslıhat depýtattary, basqarma basshylary, zııaly qaýym ókilderi men kásipkerler, etnomádenı birlestikterdiń, aqsaqaldar men analar keńesiniń músheleri, qoǵamdyq kelisim jáne damý ortalyǵynyń qyzmetkerleri qatysty. Is-sharada oblys ákimi Marat Sultanǵazıev pen Parlament Senatynyń depýtaty Janbolat Jórgenbaev oblystyq etnomádenı birlestikterdiń tóraǵalarymen birge ǵımarattyń irgetasyna ýaqyt kapsýlasyn saldy. Bul mańyzdy jobany jergilikti iri kásipkerler óz qarajaty esebinen júzege asyrýdy kózdep otyr.
Júzden asa etnos ókili tútin tútetip otyrǵan oblysta 34 etnomádenı birlestik pen qoǵamdyq uıym tirkelip, túrli áleýmettik jobany qolǵa alyp, ózara tatýlyq pen senimdi arttyrýǵa qyzmet etip jatyr. Sondyqtan bul Dostyq úıi atalǵan qurylymdardyń basyn biriktiretin qara shańyraqqa aınalary sózsiz. Munda olardyń nátıjeli jumys isteýine barlyq jaǵdaı jasalyp, jastar bastamalaryn qoldaýǵa, pikir almasýǵa, mádenı jáne qoǵamdyq jobalardy júzege asyrýǵa múmkindik beretin zamanaýı orta qalyptasady.
Saltanatty is-shara barysynda oblys ákimi M.Sultanǵazıev bul qurylystyń óńir tarıhy úshin asa mańyzdy oqıǵa ekenin atap ótti.
«Memleket basshysy Qasym-Jomart Toqaev byltyr ótken Qazaqstan halqy Assambleıasynyń HHHIV sessııasynda kópetnosty Almaty oblysynda Dostyq úıin salý qajettigi jóninde naqty tapsyrma bergen edi. Búgin sol mańyzdy tapsyrmanyń júzege asýyna kýá bolyp otyrmyz. О́zderińizge belgili, memleket tarapynan oblysymyzdyń áleýmettik-ekonomıkalyq damýyna árdaıym aıryqsha qoldaý kórsetilip keledi. Sonyń nátıjesinde óńirimizde kásipkerlik pen óndiristiń órkendeýine mol múmkindik ashyldy. Atap aıtqanda, 2022–2025 jyldar aralyǵynda Almaty oblysyna 3,7 trln teńge ınvestısııa tartyldy. Jalpy quny 930,3 mlrd teńge bolatyn 120 joba paıdalanýǵa berilip, onyń aıasynda 14 myń jańa jumys orny quryldy. Osy múmkindikterdi tıimdi paıdalanyp, óńir ekonomıkasynyń órkendeýine eleýli úles qosqan kásipkerlerimiz búgin Dostyq úıin óz qarajaty esebinen salýǵa qoldaý bildirý arqyly el aldyndaǵy azamattyq jaýapkershiliktiń joǵary úlgisin kórsetip otyr. Bul shańyraq el birligi men tatýlyqtyń ordasyna aınalady dep senemin», dedi aımaq basshysy.
«Assambleıa jastary» respýblıkalyq qoǵamdyq birlestiginiń Almaty oblysy boıynsha tóraǵasy Vera Pletneva sáni men sáýleti úılese boı kóteretin bul ǵımarat jańa múmkindikterge jol ashatynyn qýana jetkizdi.
«Búgin bárimiz tarıhı sáttiń kýási bolyp otyrmyz. Qazirgi tańda Qazaqstan 100-den asa etnos ókilin bir shańyraq astyna biriktirip, shynaıy dostyqtyń jarshysy bolyp otyr. «Birlik bar jerde tirlik bar» dep beker aıtylmaǵan. Bizdiń basty maqsatymyz – tatýlyqty tý etip, elimizdiń damýyna úles qosý. Al Almaty oblysynda Dostyq úıiniń boı kóterýi bizdiń jumysymyzǵa serpin berip, jańa belesterdi baǵyndyrýǵa septigin tıgizedi. Ásirese Assambleıa jastaryna úlken úmit pen jiger syılaıdy», degen ol oblys ákimdigi men jobaǵa uıytqy bolǵan kásipkerlerge alǵys aıtty.
Qalaǵa kórik berip, kóp ulttyń yntymaq-birliginiń uıytqysyna aınalatyn jańa nysan 2 qabatty, 1 bloktan turady. Joba boıynsha etno-mádenı ortalyqtar men birlestikter kabınetteri, 56 oryndy konferens-zal, 300 oryndy májilis zaly salynady. Sondaı-aq ǵımarat aldyna bıiktigi 92 metr bolatyn Tý tuǵyr ornatylady. Nysan qurylysy úsh aı boıy júrgizilip, jyl sońyna deıin paıdalanýǵa beriledi.
Almaty oblysy
