Elimizdiń túkpir-túkpirinen kelgen arýlar shyǵarmashylyq qabiletin, sahna mádenıetin jáne ulttyq ónerge degen qyzyǵýshylyǵyn kórsetti. Baıqaýdyń qurmetti qonaqtary men qazylar alqasynyń quramynda Qazaqstannyń eńbek sińirgen qaıratkerleri Qanat Aıtbaev pen Sveta Aıtbaeva, telejúrgizýshi Dınara Sátjan, aqyn Qalqaman Sarın, Qazaqstannyń eńbek sińirgen qaıratkeri Serjan Musaıyn, kásipker Merýert Ybysheva boldy.
Qazaqstannyń Eńbek Eri, Halyq ártisi Qaırat Baıbosynov, Qazaqstannyń Halyq ártisi Merýert О́tekesheva, Parlament Májilisiniń depýtattary Amanjol Áltaı, Qazybek Álishev, basqa da qurmetti qonaqtar qatysty.
Taǵylymy mol sharada halyqtyń ystyq súıispenshiligine bólengen Halyq ártisi Merýert О́tekeshovany Jańaarqa jurtshylyǵy aıryqsha qurmetpen qarsy aldy. Ulttyq dástúrdi ustanǵan Arqa jurtshylǵy ardaqty óner ıesine aq boz at mingizip, syı-qurmet kórsetti. Bul kórinis kópshiliktiń kóńilinen shyǵyp, baıqaýdyń mazmunyn tereńdete túsken áserli sáttiń birine aınaldy.
Baıqaý qorytyndysy boıynsha bas júldeni Astana qalasynyń arýy Tolǵanaı Naýryzbaı jeńip alyp,
1 500 000 teńgeniń sertıfıkaty tabys etildi. I oryndy Qyzylorda oblysynyń arýy Baǵdat Baqyt (1000 000 teńge), II oryndy Atyraý oblysynyń arýy Indıra Muqtar (500 000 teńge), al III oryndy Aqmola oblysynyń arýy Aıǵanym Shaqmuraı (35 0000 teńge) ıelendi. Sonymen qatar «Kórermen kózaıymy» atalymy men barlyq qatysýshylarǵa yntalandyrý syılyǵy tartý etildi.
Baıqaýdyń joǵary deńgeıde ótýine qoldaý bildirip, jeńimpazdar men qatysýshylardy marapattaý qoryn qalyptastyrýǵa úles qosqan azamattarǵa uıymdastyrýshylar erekshe alǵys bildirdi.
Ulttyq qundylyqty ulyqtap, qazaq qyzynyń parasaty men kórkem bolmysyn dáriptegen taǵylymdy jobanyń avtory ári prodıýseri Lázzat Nurlanqyzy.
Ulytaý oblysy
