Ásirese Tarbaǵataı aýdanynyń judyryqtaı jumylǵan halqy kópke úlgi boldy. Aýdan turǵyndary ózderi shot ashyp, 5 mln teńgege jýyq qarjy jınaǵan. Ortaq qazanǵa túsken qarjyny naýqastar men dárigerlerdiń qajettilikterine jumsaǵan. Indetpen kúres maqsatynda ashylǵan qorǵa eńbektegen baladan eńkeıgen qarııaǵa deıin aqsha aýdarǵan. Tipti 1-synyp oqýshysy qaltasyndaǵy 645 teńgesin ata-anasyna aıtyp, kómek retinde qorǵa salǵan. Al AQSh-ta oqyp júrgen tarbaǵataılyq Tolǵanaı Seıitqazına aýylyna alańdap, 112 myń teńge aýdaryp jibergen. Qarjyny árkim ál-aýqatyna qaraı qosty. Jarty álemdi jaılaǵan indetpen kúresý maqsatynda halyq densaýlyǵy, jaqyndarynyń ómiri úshin eshkim tartynyp qalǵan joq.
Medısınalyq qural-jabdyq, dári-dármek bolmasa, dárigerdiń dármensiz ekenin baıqaǵan jurt ýaqyt ozdyrmaı osylaısha ózdikterinen sheshim qabyldaǵan. Onyń ústine kúndelikti jarııalanyp otyrǵan tizimdegi ólim-jitimniń artýy eldiń úreıin ushyrǵan edi.
– Aýrý baryn bile tura arqany keńge salyp júrdik. Bul – shyndyq. Aty jaman dertke tamyr-tanystar shaldyǵyp, oblystan shyǵa bastaǵanda ǵana eleń ettik. Medısınalyq quraldardyń jetkiliksiz ekenin baıqap, top qurdyq. Qarjy jınadyq. Bar oıymyz – dertpen kúresýge tamshydaı bolsyn úles qosý edi, – deıdi qoǵam belsendisi Ermek Qurmanǵalı.
Janashyr azamattar indetpen kúreske úlken úles qosa bildi. Qorǵa qarjy jınaǵan tarbaǵataılyq jomart jandar ókpeni jeldetetin apparattyń 10 danasyn satyp aldy. Dem jetpeı qınalyp jatqan naýqastar úshin eń keregi osy apparat edi. Sondaı-aq bastaryn qaýipke tigip, kún-tún demeı adam ómirine arasha túsip júrgen dárigerlerdi qorǵanys kostıýmderimen qamtydy. Betperde, antıseptık syndy kúndelikti qajetti zattar da jetkizildi.
Álemdi ábigerge salǵan pandemııa kezinde Shyǵys Qazaqstan oblysynda kásipkerler de judyryqtaı jumylyp, jomarttyq tanytqany belgili. Iri qazaqstandyq «Bi Group» qurylys kompanııasy da medısına mekemelerine kómek kórsetken. Koronavırýs ınfeksııasyna qarsy kúresý jolynda «Aitas KZ» AQ kompanııasy medısınalyq qurylǵylar men preparattar úshin densaýlyq saqtaý mekemelerine kómek retinde 200 mln teńge bólgenin de aýyz toltyryp aıtýǵa bolady.
О́zge de kásipkerler «Halıfa Altaı» meshiti arqyly myńdaǵan janǵa kómek qolyn sozdy. Oblystyq meshit pen Zeket qory qyzmetkerleri jazdaı aýrýhanada jatqan naýqastarǵa qymyz ben azyq-túlik taratyp otyrdy.
Qazir oblystaǵy jaǵdaı ońalyp keledi. Sońǵy derek boıynsha, Shyǵys Qazaqstanda 11 naýqas tirkelgen. Onyń altaýy – Semeıde, ekeýi – Rıdderde. Sondaı-aq Kýrchatovta eki jaǵdaı anyqtalǵan. Al oblys ortalyǵy men Glýbokoe aýdanynda bir-birden. Dese de tıisti saqtyq sharalary jalǵasyn taba bermek.
Shyǵys Qazaqstan oblysy
