Shildeniń basynda indetke shaldyǵýshylardyń kúrt artýyna baılanysty qaladaǵy barlyq emhana men aýrýhana qyzmetkerleri provızorlyq gospıtaldarǵa ýaqytsha jumyldyrylyp, munymen bir kezde óz jumys oryndarynda eńbekaqylary saqtalatyny ýáde etilgen. Alaıda pandemııa kezinde naýqastardyń ómirin qutqarǵan melısına qyzmetkerleriniń qoldaryna úsh aıdan beri eshteńe tımegen.
Osy jaǵdaıǵa baılanysty oblystyq densaýlyq saqtaý basqarmasynyń basshysy Samat Danııarov pen Mindetti áleýmettik medısınalyq saqtandyrý qorynyń Aqtóbe oblysy boıynsha dırektory Batyrbek Nurǵalıev túsinik berdi. Indet órship jatqan kezde ornynan óz erkimen ketken Áset Qalıevtiń ornyna jaqynda ǵana taǵaıyndalǵan Samat Danııarov tólemderdiń keshiktirilýine medısınalyq qyzmetke tólenetin tarıfterdiń ózgertilýine baılanysty tehnıkalyq kidirister sebep boldy deıdi. Onyń aıtýynsha, búgin COVID-19 jáne vırýstyq pnevmonııa órship turǵanda provızorlyq ortalyqtarda jumys istegen qyzmetkerlerge maýsym –shilde aıyna tıesili tólemder aýdaryldy, endi az kúnde tamyz aıynyń qaryzdary tolyq ótelmekshi.
"Másele provızorlyq gospıtaldardy qarjylandyrýdaǵy qıyndyqtarǵa baılanysty týyndady. Sebebi, bıylǵy shildege deıingi qoldanystaǵy emdeý tarıfteri medısınalyq mekemelerdiń barlyq shyǵyndaryn ótegen joq. Pandemııa bastalǵanda Densaýlyq saqtaý mınıstriniń buıryǵymen 1 shildeden bastap provızorlyq stasıonarlardaǵy emdeý tarıfteri qaıta qaralyp, ózgeristerdiń medısınalyq aqparattyq baǵdarlamaǵa engizilýi ýaqyt aldy" - , dedi Mindetti áleýmettik medısınalyq saqtandyrý qorynyń Aqtóbe oblysy boıynsha dırektory Batyrbek Nurǵalıev.
Aqtóbe oblysy
