Bıyl elordalyqtardy tumaýǵa qarsy vaksınasııalaý úshin 110 myń doza vaksına satyp alyndy, dep habarlaıdy Nur-Sultan qalasynyń Qoǵamdyq densaýlyq saqtaý basqarmasy. Tumaýǵa qarsy vaksınasııanyń astanalyqtarǵa tirkelgen meken-jaıy boıynsha jergilikti alǵashqy medısınalyq-sanıtarlyq kómek uıymdarynda júrgiziledi degen Qoǵamdyq densaýlyq saqtaý basqarmasy vaksınasııanyń birinshi kezekte qandaı sanattaǵy adamdarǵa salynatynyn aıtty. Olar– sozylmaly aýrýlary bar 18 jasqa deıingi balalar; medısınalyq qyzmetkerler; júkti áıelder (júktiliktiń alǵashqy 2-3 aıy); jabyq mekemelerdegi adamdar (balalar úıi, úı, ınternat); eresek múgedekter men sozylmaly aýrýlary bar balalar; 60 jastan asqan qart adamdar kórinedi.
"Qazaqstanda jyl saıyn tumaýǵa qarsy jappaı ımmýndaý tumaýdyń epıdemııalyq taralýy men ólim men asqynýlardyń deńgeıin tómendetý maqsatynda júrgiziledi. Vaksınasııalaýda organızmge ınfeksııalyq agent bólshegi engiziledi. Ol ınfeksııalyq agent aýrýdy týdyrýy múmkin emes, biraq aǵzada antıdenelerdi shyǵarýǵa yntalandyrýy múmkin", - deıdi Qoǵamdyq densaýlyq saqtaý basqarmasynyń mamany Fatıma Smagýlova.
Nazar aýdaratyn jaıt, vaksınasııa oǵan qarsy kórsetkishteri bar adamdarǵa jasalmaıdy. Eger aǵzada ótkir vırýstyq ınfeksııa bolsa (tamaq aýrýy, jótel, bezgek), onda vaksına alýǵa bolmaıdy.
Sondaı-aq sozylmaly aýrýlardyń órshý kezinde de vaksınalardan ýaqytsha bas tartýǵa týra keledi. Eki jaǵdaıda da pasıentter saýyqqannan keıin nemese sozylmaly aýrýdyń turaqty jaqsarýynan keıin vaksınasııalanady, deıdi qalalyq qoǵamdyq densaýlyq saqtaý qyzmetindegi mamandar.
