Áýe qorǵanysy kúshteri bas qolbasshysynyń burynǵy orynbasary Asqar Bóldeshov pen onyń kásipker dosy Talǵat Jumahanov ekeýi osynshama kólemdegi bıýdjet aqshasyn yń-shyńsyz bólip ala salmaq bolypty. Sol úshin aıyptylar oryndyǵyna otyryp, ózderine qatysty sottyń alǵashqy prosesin bastan ótkizip úlgerdi. Bul týraly KTK telearnasy habarlady.
Áýe qorǵanysy kúshteri bas qolbasshysynyń burynǵy orynbasary Asqar Bóldeshov pen onyń kásipker dosy Talǵat Jumahanov ekeýi osynshama kólemdegi bıýdjet aqshasyn yń-shyńsyz bólip ala salmaq bolypty. Sol úshin aıyptylar oryndyǵyna otyryp, ózderine qatysty sottyń alǵashqy prosesin bastan ótkizip úlgerdi. Bul týraly KTK telearnasy habarlady.
Aınalyp kelip, quqyq qorǵaýshylardyń qolyna túsken bul eki jan aıamas dostar munyń burqyrap jatqan qaınar kózi retinde áskerı bólimniń qarý-jaraq qoımasynyń aınalasy dep bilgen. Tátti armannyń qushaǵyna titirenbeı qoıyp ketken bular kásipkerdiń kásibi azyq-túlik taýarlaryn jetkizip turýmen ǵana shekteletinin de eskermeıdi. Sóıtip, qarý-jaraq pen oq-dáriniń ıisi murnyna da barmaıtyn bıznesmen osyndaǵy dosynyń arqasynda sol boıynsha ótken tenderge qatysyp, ony utyp ta alady. Sonyń arqasynda qos sybaılas «S-300 zenıtti-zymyran keshenine qosalqy bólshekter jetkizemiz» dep qazynanyń 145 mln. teńgesin qolq etkizip, birden jutyp jiberedi.
Asqar Bóldeshov buǵan deıin áleýet qurylymdaryna azyq-túlik jetkizýmen aınalysyp kelgen óziniń jaqyn dosy Talǵat Jumahanovqa tıesili «RG Trade» kompanııasyn memlekettik satyp alýǵa qatystyrypty.
Bir qyzyǵy, áskerı tehnıkadan maqurym fırma Almaty oblysy Boraldaı kentindegi qazaq áýe qorǵanysynyń negizgi kúshi S-300 zenıtti-zymyran keshenine qosalqy bólshekter jetkizýi tıis bolǵan. Keıin ákelingen qural-saıman jaramsyz bolyp shyqty. Ony ornatqanda zymyrandar ushýǵa jaramaı, al radıolokasııalyq stansa shekara buzǵan birde-bir ushaqty taba almas edi.
Tergeý materıaldaryna súıensek, ym-jymy bir qos sybaılas bıýdjetten tenderge bólingen 200 mln. teńgeni ózara bólip almaq bolǵan. Sonyń 145 mln. teńgesin «RG Trade» fırmasynyń esepshotyna aýdaryp ta úlgergen eken. Keıin qarjynyń bir bóligine kásipker dosy Asqar Bóldeshovtiń aýyldaǵy áke-sheshesine monsha turǵyzyp bergen. Sotta shendiniń basqa bylyqtary da áshkerelendi.
Áskerı prokýrordyń aıtýynsha, Bóldeshov túrli mereıtoılar, halyqaralyq «Kadeh» qarý-jaraq kórmesin ótkizý jeleýimen áskerı bólim komandırlerinen 10 myńnan 90 myń teńgege deıin aqsha alyp otyrǵan. Qarjyny jeke bank kartochkasyna aýdartqyzypty. Onyń nómirin telefonmen bolmasa sms habarlama arqyly joldap turypty. Ol eki jyl boıy ofıserlerden osylaısha 1 mln. 648 myń teńge jınap alyp, qaltasyna basqan.
Sot prosesi úsh aıǵa sozylýy múmkin.
Qurysh NURYMBET.
