Bıyl elordalyqtardy tumaýǵa qarsy vaksınasııalaý úshin 110 myń doza vaksına satyp alyndy, dep habarlaıdy Nur-Sultan qalasynyń Qoǵamdyq densaýlyq saqtaý basqarmasy. Tumaýǵa qarsy ekpe astanalyqtarǵa tirkelgen mekenjaıy boıynsha jergilikti alǵashqy medısınalyq-sanıtarlyq kómek uıymdarynda júrgiziledi. Qoǵamdyq densaýlyq saqtaý basqarmasy ekpeniń birinshi kezekte qandaı sanattaǵy adamdarǵa salynatynyn aıtty. Olar – sozylmaly aýrýlary bar 18 jasqa deıingi balalar; medısınalyq qyzmetkerler; júkti áıelder (júktiliktiń alǵashqy 2-3 aıy); jabyq mekemelerdegi adamdar (balalar úıi, úı, ınternat); eresek múgedekter men sozylmaly aýrýlary bar balalar; 60 jastan asqan qart adamdar kórinedi.
«Qazaqstanda jyl saıyn tumaýǵa qarsy jappaı ımmýndaý tumaýdyń epıdemııalyq taralýy jáne ólim men asqynýlardyń deńgeıin tómendetý maqsatynda júrgiziledi. Vaksınalaýda aǵzaǵa ınfeksııalyq agent bólshegi engiziledi. Ol ınfeksııalyq agent aýrýdy týdyrýy múmkin emes, biraq aǵzada antıdenelerdi shyǵarýǵa yntalandyrýy múmkin», deıdi Qoǵamdyq densaýlyq saqtaý basqarmasynyń mamany Fatıma Smaǵulova.
Nazar aýdaratyn jaıt, vaksınalaý oǵan qarsy kórsetkishteri bar adamdarǵa jasalmaıdy. Eger aǵzada ótkir vırýstyq ınfeksııa bolsa (tamaq aýrýy, jótel, bezgek), onda ekpe alýǵa bolmaıdy. Sondaı-aq sozylmaly aýrýlardyń órshýi kezinde de vaksınalaýdan ýaqytsha bas tartýǵa týra keledi. Eki jaǵdaıda da pasıentter saýyqqannan keıin nemese sozylmaly aýrýdyń turaqty jaqsarýynan keıin vaksınasııalanady, deıdi qalalyq qoǵamdyq densaýlyq saqtaý qyzmetindegi mamandar.
