Qalalyqtardyń "Almaty" telearnasynyń Akimat Live baǵdarlamasy arqyly efırde qoıylǵan suraqtarǵa jaýap bere kelip, saýda ortalyqtarynyń alańdaryn jalǵa alǵan kásipkerlerge qoldaý kórsetý sharalary týraly aıtty.
Buryn habarlanǵandaı, TJ rejimi kezinde qyzmet kórsetý salalary aıtarlyqtaı shyǵynǵa ushyrady, olar - qoǵamdyq tamaqtaný oryndary, fıtnes pen sport, saýda jáne basqalary. Búgingi kúni, 9 myńǵa jýyq (24,7%) kásipkerler jalǵa alǵan oryndaryna qatysty qıyndyqtardy bastan ótkerýde. Osyǵan oraı, jalǵa berýshilermen jeńildikter jasaý máselesi pysyqtalýda.
B.Saǵyntaev atap ótkendeı, jalǵa berýshilerdiń kópshiligi usynysty qabyl alyp, jalǵa alynǵan oryndardyń tólemin esepteýdi toqtatty.
"Tótenshe jaǵdaı rejımi men karantın kezinde iri saýda nysandarynyń ıeleri, onyń ishinde 153 saýda jáne oıyn-saýyq ortalyqtary, saýda ortalyqtary, saýda úıleri men bazarlar 40 myńǵa jýyq jalǵa alýshylardan tólem alýdy toqtatty. Bulardan ózge, qazirgi kezde kóptegen bazarlar men saýda jáne oıyn-saýyq ortalyqtary jalǵa berý baǵasyn 20-30%-ǵa tómendetti", dep habarlady Almaty ákimi.
Almatyda "Atameken" UKP yqpal etýimen saýda nysandaryndaǵy 13 myńǵa jýyq jalǵa alýshylardyń 2,7 mlrd teńge somasyndaǵy máselesi sheshildi. Bul baǵyttaǵy jumys jalǵasýda.
Mysaly, Moskva metropolitan OSO-nyń saýda alańdarynda 180 jalǵa alýshy bar, olardan aı saıyn 265 mln teńge tólem túsedi. Qomaqty shyǵynǵa ushyraǵanyna qaramastan, jalǵa berýshi daǵdarysqa qarsy jeke sharalardy qabyldaı otyryp, jalǵa alýshylardy tólemderden bosatty.
"Avtosıtı" SÚ-de 120 jalǵa alýshy bar, olardan aı saıyn 6 mln teńge túsedi. Saýda úıi de jalǵa alýshylarǵa qoldaý kórsetýge jáne TJ men karantın kezinde olarǵa demalys berýge daıyn.
Kásipkerler nesıeleriniń tólemderin shegerýge qatysty aıta kelip, qala ákimi EDB basshylarynyń tólemderdi shegerý máselesi talqylanatyn Iskerlik keńesiniń quramyna engenderin habarlady. Búgingi kúni 127,3 mlrd teńgeniń 360 myń nesıesi boıynsha tólem shegerildi.
Sonymen qatar, bıznesti qoldaý men damytý jónindegi memlekettik jáne óńirlik baǵdarlamalar aıasynda syıaqy mólsheri tómendetildi. Mysaly, BJK baǵdarlamasy boıynsha kásipkerler úshin mólsherleme 6%-ǵa deıin (burynǵysy 8,4%), "Almaty Business-2025" baǵdarlamasy aıasynda 7%-dan 6%-ǵa deıin azaıdy.
Qosymsha, "Damýmen" birge ShOB endi qarqyn ala bastaǵan Alataý, Naýryzbaı, Jetisý, Túrksib jáne Áýezov aýdandarynda syıaqynyń jyldyq mólsherlemesin 7%-dan 5%-ǵa deıin tómendetý boıynsha jumystar júrýde.
