Qarasha aıynda Kókshetaý qalasynda Qazaqstan men Reseı elderi shekaralyq áriptestigi forýmy ótedi. Jıynda negizgi basymdyq Oral ózeniniń jaǵdaıyn talqylaýǵa beriledi. Bul týraly Ekologııa, geologııa jáne tabıǵı resýrstar mınıstri Maǵzum Myrzaǵalıev Batys Qazaqstan oblysy jurtshylyǵymen bolǵan onlaın-kezdesýde málimdedi.
"Bizdiń mınıstrliktiń bastamasymen osy jyly qarashada Kókshetaýda ótetin shekaralyq áriptestik forýmynda basymdyq Oral ózeniniń jaǵdaıyna, Jaıyq ózenindegi problemalarǵa beriledi. Biz Reseı Federasııasyna birneshe ret baryp, bul máselelerdi kótergenbiz", dedi M.Myrzaǵalıev.
Onlaın-kezdesýge qatysqan Ekologııa mınıstrligi shekaralyq ózender departamentiniń dırektory Álııa Shalabekova ózende gıdrologııalyq zertteý júrgizý týraly kelisimge qol jetkizilgenin aıtty. Atalǵan zertteýde gıdrotehnıkalyq ǵımarattardyń ózenge áseri de eskeriledi.
Zoom-júzdesý barysynda Batys Qazaqstan oblysy turǵyndary mınıstrlik ókilderimen óńirdegi ekologııalyq problemalardy sheshýge arnalǵan Jol kartasy jobasyn da talqylady. Jospar ekologııany jaqsartýǵa negizdelgen jıyrmaǵa jýyq is-sharadan turady. Onyń ishinde memlekettik orman qoryndaǵy jasyl alqaptar aýmaǵyn 2025 jylǵa deıin 782 gektardan 1200 gektarǵa jetkizý, jolaýshylar kóliginde dızel otynyn paıdalanýǵa tyıym salý, óndiriske qaldyqtar monıtorınginiń avtomattandyrylǵan júıesin engizý jáne taǵy basqa atqarylatyn jumystar bar.
Jol kartasy halyqtyń usynystary eskerilip, eki apta ishinde daıyndalyp bitedi.
