Renovasııa baǵdarlamasy boıynsha qaladaǵy eski úılerdi súrý jolymen "eski" aýmaqtar keshendi jańaryp, turǵyndar jańa úılerge kóshedi.
B.Saǵyntaev habarlaǵandaı, renovasııa baǵdarlamasy myńdaǵan qalalyqtardyń ómir súrý sapasyn jaqsartýǵa jáne qurylys salasyna ınvestısııa tartýǵa baǵyttalǵan.
"Qalada 1444 eski úıler bar. Sonyń 609-y Túrksib aýdanyna tıesili. Munda "Almaty ákimdiginiń kúrdeli qurylys kásiporny" 62 páterge arnalǵan 5 qabatty eki úı turǵyzdy. Úsh eski úıdiń (42 páter) ornyna ınvestorlardyń kúshimen 152 páterlik 7 úı boı kóteredi. Osıpenko kóshesinde 59 páterli eki úıdiń qurylysy bastalady. Sondaı-aq jeke ınvestordyń esebinen 30 eski eki qabatty úıdiń ornyna 1252 páterge arnalǵan 26 zamanaýı bes qabatty ǵımarat salý josparlanýda", dep jazdy Almaty ákimi.
"Almaty ákimdiginiń kúrdeli qurylys kásiporny" Túrksib aýdanynda renovsııa jobasyn Saýranbaev – Moldaǵalıev – Chernyshevskıı – Tolstoı kósheleri aýmaǵynda iske asyratyn bolady. Jeke ınvestor aýqymdy joba boıynsha jańa úılerdi osydan 60 jyl buryn salynǵan ekiqabatty eski úıler turǵan Seıfýllın dańǵyly – Aqan seri – Kassın – Kotelnıkov kósheleriniń aýmaǵynda salatyn bolady.
Bulardan ózge, Almaty ákiminiń málimeti boıynsha, Medeý aýdanynda 21 páterge arnalǵan eski úsh úıdiń ornynda 303 páterli 6 úıdiń qurylysy aıaqtalyp qaldy. Jetisý aýdanynda 70 páterli 8 eski úıdiń ornyna ınvestorlarmen birge 489 páterli 7 úıdiń qurylysyn bastaý josparlanǵan.
