Sýretti túsirgen Erlan OMAR, «EQ»
Qyrkúıektiń 18-i kúngi derek boıynsha elimizde 107 134 naýqas tirkelgen, sońǵy táýlikte 78 adam COVID-19 vırýsyn juqtyrǵan. Búginde 3835 adam emdelip jatyr, 1689 azamat qaıtys boldy. Sonymen qatar koronavırýs ınfeksııasynyń 30 579 yqtımal jaǵdaıy tirkelip, 26 533 adam emdeldi, 337 adam kóz jumdy. Bul týraly Ortalyq kommýnıkasııalar qyzmeti alańynda Densaýlyq saqtaý mınıstrliginiń resmı ókili Baǵdat Qojahmetov málimdedi.
«14 qyrkúıekte coronavirus.kz saıtynda KVI-ge uqsas pnevmonııadan aıyqqan 6 853 pasıent týraly aqparat jarııalandy. Al 15 qyrkúıekte bul kórsetkesh artyp, emdelip shyqqandar 26 335 adamdy qurady. Mundaı kúrt ósý 1 tamyzdan 13 qyrkúıekke deıin stasıonarlyq, ambýlatorııalyq deńgeıde jáne úıde emdelgen barlyq pasıenttiń deregi málimetter bazasyna engizilýine baılanysty boldy», dep B.Qojahmetov.
Búginge deıin Qazaqstanda COVID-19 vırýsyn qaıta juqtyrǵan jaǵdaı tirkelmegen. Koronavırýs ınfeksııasynan keıin Kavasakı sındromyna uqsas dertke dýshar bolǵan balalardyń da jaǵdaıy ońalyp kele jatyr. Mundaı aýrýmen jalpy 35 bala aýyrǵan. Sońǵy 7 kúnniń ishinde birde-birde bir balada Kavasakı sındromy anyqtalǵan joq. 35 balanyń 31-i aman-esen emdelip, úıine qaıtty. Qalǵan 4 bala qazir em alyp jatyr. Emdelip shyqqan balalar ýchaskelik dárigerlerdiń baqylaýyna alynǵan.
«Jaý joq deme, jar astynda» degendeı, báleket indettiń qaýpi áli seıile qoıǵan joq. Koronavırýstyń boljaldy ekinshi tolqyny bosańsýǵa áste bolmaıtynyn qaperimizge salyp otyr. Vırýs juqtyryp, aýrýhanaǵa túsken naýqastar sany 30 myńǵa jetkende karantın sharalary qatańdatylmaq.
«Búginde densaýlyq saqtaý júıesi stasıonarlarda kez kelgen sátte koronavırýs juqtyrǵandarǵa 70 myńnan asa tósektik oryn daıyndaı alady. Bul «qyzyl shek» sanalady. Qazir elimizde ortasha eseppen 500-600 naýqas anyqtalyp jatyr. Eger bul kórsetkish 30 myńǵa jetetin bolsa, onda eń qatań karantın sharalaryn engizýge týra keledi», dedi mınıstrliktiń resmı ókili.
Onyń aıtýynsha, koronavırýstyń ortasha jáne aýyr formasymen aýyrǵandardy qamtý úshin elimizge 5 myń ókpeni jasandy jeldetý apparaty qajet. Búginde bul apparattar satyp alynyp, aýrýhanalarǵa jetkizilgen. Apparattardyń 1,5 myńy Qazaqstanda jasalǵan. Elimiz boıynsha juqpaly aýrýlar aýrýhanalarynyń, provızorlyq ortalyqtardyń basym bóligi, aýrýhanalardyń barlyǵy ottegi konsentratymen qamtamasyz etilgen.
Sondaı-aq 3,5 myńnan asa mobıldi brıgada quryldy. Onyń basty maqsaty – bir saǵattyń ishinde naýqasty jaqyn aradaǵy aýrýhanaǵa jetkizip, alǵashqy medısınalyq kómek kórsetý. Aýyl-aımaqta medısınalyq kómektiń qoljetimdiligin qamtamasyz etý úshin 100 arnaýly avtobýs satyp alynyp, ár óńirge úlestirildi. Buǵan qosa shalǵaıdaǵy eldi mekenderde jyljymaly dárihana pýnkteri iske qosyldy.
Sonymen qatar brıfıng barysynda DSM Taýarlar men qyzmetterdiń sapasy men qaýipsizdigin baqylaý komıtetiniń juqpaly aýrýlardy epıdemııalyq qadaǵalaý basqarma basshysy Roza Qojapova indet juqtyrý qaýpi kúsheıip turǵan shaqta elderdiń sanaty jáne áýe reısterimen keletin jolaýshylar jóninde sóz qozǵady.
Onyń aıtýynsha, áýe reısteri boıynsha ózgerister engizildi. Endi birinshi sanatqa 12 el kiredi. Bul qatarda QHR, Taıland, Mońǵolııa, Malaızııa, Mysyr, Gonkong, Ońtústik Koreıa, Japonııa, Sıngapýr, Germanııa, Belarýs, Ázerbaıjan bar. Osy elderden kelgen jolaýshylar termometrııa men saýaldamadan ótedi.
Ekinshi sanatqa 21 el engizildi. Osy elderden saparlap kelgender termometrııa men saýaldamadan bólek, PTR ádisimen zerthanalyq tekserýdiń teris nátıjesi bar COVID-19-ǵa tekserilgeni týraly anyqtama usynýy kerek.
