Oqıǵa • 22 Qyrkúıek, 2020

Kópbalaly otbasy baspanaly boldy

31 ret kórsetildi

Kópbalaly Skandarbek pen Gúlmıra Ermuhanovtar «Baqytty otbasy» baǵdarlamasy aıasynda Aqtóbe qalasynyń «Nur-Sıtı-3» shaǵyn aýdanynan eki bólmeli jańa páterge ıe boldy.

– 2015 jyly Aqtóbe qalasyndaǵy turǵyn úı qorynan bólinetin baspana kezegine turdym. Sodan byltyr memleketten turǵyn úı alýǵa qol jetkizetin «Baqytty otbasy» baǵdarlamasy jarııalanǵanda qujattarymdy jalpy kezekten alyp, osy baǵdarlamaǵa qatysýǵa ótinish jazdym. Biraq buryn alǵan nesıe qaryzdarym bolǵandyqtan, ony tolyq ótemeıinshe qujattarym qabyldanbaıtyn boldy. Sebebi «Baqytty otbasy» baǵdarlamasy boıynsha úı alǵysy keletinderge qoıylatyn negizgi talap – basqa da nesıe qaryzdary bolmaýy kerek. Bankter aldyndaǵy qaryzdarymdy japqan soń bıyl kóktemde qaıta kezekke tirkelgende ótinishim bir jarym aıdyń ishinde qaraldy. Osy aıdyń basynda sý jańa páterimizge kirdik. Balalarymnyń qýanyshynda shek joq, qazir bastaýysh synypta oqıtyn úsheýi úıden onlaın oqýǵa kiristi, – deıdi Gúlmıra Ermuhanova.

32 jasynda alty balanyń anasy atanǵan Gúlmıra bala kútimimen úıde, al joldasy Skanerbek «Ramazan» JShS-da jumys isteıdi. Bul otbasy aýmaǵy 61 sharshy metr bolatyn sý jańa páterge qazan aıynan bastap 39 myń teńgeden ıpotekalyq nesıe tóleıdi. Nesıe 8 jylǵa rásimdelgen, páterdiń tolyq quny – 8 mln 200 myń teńge. Birneshe jyl boıy Aqtóbede bir bólmeli shaǵyn páterdi aıyna 50 myń teńgege jaldap kelgen erli-zaıypty Ermuhanovtar «Baqytty otbasy» baǵdarlamasy tabysy orta, kópbalaly otbasylarǵa jaqsy qoldaý boldy dep rızashylyq bildiredi.

 

Aqtóbe

 

Sońǵy jańalyqtar

15169 adam koronavırýs juqtyrdy

Koronavırýs • Keshe

Uqsas jańalyqtar