Elordada karantın tártibin eń óreskel buzýshylar – tamaqtaný oryndary men oıyn-saýyq mekemeleriniń ıeleri. Bul týraly brıfıng barysynda Nur-Sultannyń bas memlekettik sanıtarlyq dárigeri Janna Pirálıeva aıtty.
«Kásipkerlik sýbektileri arasynda karantın rejımin elemeı, birneshe ret buzýshylar bar. Mysaly, Esil aýdany, Turan dańǵyly, 2-de ornalasqan Auraclub Alanya jazǵy kafesi bar túngi klýb shekteý jáne karantın sharalaryn buzǵany úshin segiz ret ákimshilik jaýapkershilikke tartyldy. Atap aıtqanda belgilengen jumys ýaqytyn, maska taǵý tártibin, áleýmettik qashyqtyq saqtamaǵany jáne túngi klýb pen karaoke bólmelerine tyıym salynǵanyna qaramastan jumysyn júzege asyrǵany úshin», – deıdi Janna Pirálıeva.
Mamandar epıdemııalyq ahýal jazdaǵymen salystyrǵanda turaqtalǵanymen, vırýs qaýpi áli joǵary ekenin aıtady. Búginde Nur-Sultanda kún saıyn úshten jıyrmaǵa deıin KVI aýrýy tirkelýde.
«Qala turǵyndary men qonaqtaryn sanıtarııa erejelerin saqtaýǵa shaqyramyn, óıtkeni vırýs qaýpi áli de bar. Búkil álemdegi KVI epıdemııalyq jaǵdaıyn eskerý qajet. Aldaǵy epıdemııalyq maýsymda tumaýǵa qarsy ekpe jasaý, ımmýnıtetti nyǵaıtý, jyly kıiný, syrqattanǵan jaǵdaıda óz betinshe emdelmeı, dereý dárigerdiń kómegine júginý kerek», – dedi elordanyń bas memlekettik sanıtarlyq dárigeri.
Mamandar eger turǵyndar sanıtarııa erejelerine nemquraıly qaraı berse, jaǵdaı ýshyǵýy múmkin ekenin eskertedi.
Aıta ketý kerek, tirkelgen barlyq KVI juqtyrý jaǵdaıynyń 4,2%-y, ıaǵnı 594-i 14 jasqa deıingi balalar. Sondaı-aq 15-ten 17 jasqa deıingi 75 jasóspirim indet juqtyrdy.
