Infografıkany jasaǵan Qonysbaı ShEJIMBAI, «EQ»
Semeı medısınalyq ýnıversıtetinde bolǵan Parlament Senatynyń depýtattary eldegi medısına kadrlarynyń tapshylyǵyn talqyǵa saldy. Máselen, pandemııamen kúres kezinde ár óńirge bilimdi-bilikti dárigerlerdiń qajet ekenine kóz jetti. Bul týraly Prezıdent Qasym-Jomart Toqaev Qazaqstan halqyna Joldaýynda «Pandemııa týyndatqan daǵdarys bizdi kóp nársege úıretti. Máselen, dárigerdiń eńbegin baǵalaı biletin boldyq. Bir kezde medısına qyzmetkerleriniń memleket nazarynan tys qalǵany ras» degen edi. Sondyqtan da Senat depýtattary suranysqa ıe mamandardy daıarlaý, bilim berý granttarynyń deńgeıin nazarǵa alý syndy usynystaryn aıtty.
– Semeı memlekettik medısınalyq ýnıversıtetiniń bazasynda bilikti dárigerlerdiń, oqytýshy-professorlyq quramnyń baryn kórdik. Biraq bizdiń elimizde 4 myńǵa jýyq dáriger jetispeıdi. Ásirese ınfeksıonıster, vırýsolog mamandar qat. Osyǵan baılanysty tıisti mamandyqtar men kafedralardy ashý qajet, – dedi Senattyń Áleýmettik-mádenı damý jáne ǵylym komıtetiniń tóraǵasy Murat Baqtııaruly.
Indettiń ekinshi tolqynyna tótep berý úshin aldyńǵy qatarda júretin mamandardyń biliktiligin arttyrý týraly da usynystar aıtyldy. Eldegi jáne álemdegi sanıtarlyq-epıdemııalyq jaǵdaıǵa baılanysty alda turǵan jaýapty mindetter talqylandy. Medısınalyq ýnıversıtet mamandarynyń aıtýynsha, pandemııa kezinde ınfeksıonıster men vırýsologtardyń aýadaı qajettigi baıqalǵan. Qazirgi tańda elimiz úshin suranysqa ıe mamandyqtar tizimi eskerilip, ınfeksıonıster, reanımatologtar, pýlmonologtar, kardıologtar oqytylyp jatyr. Sonymen qatar atalǵan oqý orny elimizde birinshi bolyp shuǵyl kómek kórsetý dárigerlerin qaıta daıarlaýdy qolǵa alǵan.
Kezdesý barysynda depýtattarǵa oqý ornynyń qyzmetkerleri men stýdentterine qyzmet kórsetý ortalyǵynyń múmkindikteri kórsetildi. Munda bir tereze qaǵıdaty boıynsha, árbir qyzmetker nemese bilim alýshy, qerekti anyqtamalar nemese keńester ala alady. Qajetine qaraı memlekettik qyzmetter de kórsetiledi. Jaǵdaıǵa baılanysty bul qyzmet túrlerin onlaın rejimde kórsetýge de tolyq múmkindik bar.
Ýnıversıtettiń akademııalyq jumys departamentiniń dırektory Aıgúl Júnisova oqý ordasynyń qyzmeti, jetistikteri men strategııalyq jospary týraly baıandady.
– Semeı medısınalyq ýnıversıteti respýblıkadaǵy medısınalyq joǵary oqý oryndary arasyndaǵy reıtıngte birinshi orynda tur. Stýdentterdiń praktıkalyq daıyndyǵy úshin ýnıversıtet quramyna jekemenshik ýnıversıtettik gospıtal, radıasııalyq medısına jáne ekologııa ortalyǵy kiredi. Sondaı-aq О́skemen jáne Pavlodar qalalarynda ýnıversıtettiń fılıaldary jumys istep tur, – deıdi A.Júnisova.
Qazirgi ýaqytta joǵary oqý ornynda 5 myńnan astam stýdent bilim alýda. Onyń ishinde bakalavrıat, magıstratýra, doktorantýra sııaqty úsh deńgeıli oqytýdyń tolyq sıkli jumys isteıdi. Oqýdy támamdaǵan stýdentterdiń barlyǵy derlik jumysqa ornalasady. Keıbireýi alys-jaqyn shetelderge de shyǵyp eńbek etedi. Oqý sapasynyń deńgeıin arttyrý úshin ýnıversıtet oqytýshylary halyqaralyq tájirıbeni engize otyryp, bilim berý prosesin úzdiksiz jetildirýmen aınalysady. Mysaly, 2019 jyly Túrkııanyń Bashkent ýnıversıtetimen birlesip jańa bilim berý baǵdarlamasy engizildi.
«Artyq bilim – kitapta». Depýtattar ýnıversıtettiń kitap qoryna da bas suqty. Munda 700 myńnan astam kitap, ǵylymı eńbekter jınaqtalǵan. Mamandar kitap qory únemi jańartylyp otyratynyn tilge tıek etti. Kitaphana qundy qorǵa toly bolǵanymen, stýdentter nemese ýnıversıtet qyzmetkerleri qaǵaz toltyrmaı-aq «Adaldyq dúkeni» jobasy aıasynda kez kelgen qajetti ádebıetterin ala alady. Mundaı áleýmettik joba erteńgi mamandardy adaldyqqa tárbıeleıdi desedi ustazdar.
Bul oqý ornynda bilim men tárbıe qatar beriledi. Sonyń bir aıǵaǵy, pandemııa kezinde stýdentter halyq densaýlyǵy úshin «qyzyl aımaqtarda» jumys istedi. Al ýnıversıtet korpýstary koronavırýs ınfeksııasyn juqtyrǵan pasıentterdi emdeýge arnalǵan stasıonarlar qurý úshin qaıta beıimdeldi.
Medısına salasyn nazarǵa alǵan depýtattar Semeıdiń jedel medısınalyq járdem aýrýhanasynda bolyp, gıbrıdti operasııa bóliminiń jumysymen de tanysty. Munda olar medısına qyzmetkerleriniń jalaqysyn kóterý jónindegi oılaryn ortaǵa saldy.
Qart qalanyń Qaraǵaıly shaǵyn aýdanynda bolǵan komıtet músheleri kúnnen kúnge kórkeıip kele jatqan aýdannyń damý qarqynyn kórdi, kópprofıldi mádenı-sport keshenin aralady. Kóne qala kórkeıip kele jatqanymen, densaýlyq saqtaý salasynda birqatar máselelerdi joqqa shyǵara almaımyz desedi depýtattar.
– Medısına mamandarynyń jetispeýshiligin mınıstrmen birlese otyryp talqylaımyz. Kezdesý 30 qazanǵa josparlanǵan, – dedi Murat Baqtııaruly.
Delegasııa músheleri Semeıdegi áleýmettik nysandardy aralaǵan soń Abaıdyń týǵan jerine jol júrdi. Olar Aqshoqy, Qaraýyl, Qasqabulaq aýyldary men Jıdebaıda bolyp, Qunanbaı О́skenbaıuly mýzeıimen, «Abaı-Shákárim» memorıaldyq keshenimen tanysty. Depýtattar Abaı aýdanyndaǵy áleýmettik nysandardy da umyt qaldyrmady.
Shyǵys Qazaqstan oblysy
