Konferensııada sóz sóılegen Huawei kompanııasynyń basqarma tóraǵasy Go Pın kásiporyndardyń jáne úkimetterdiń basqarý júıelerin jetildirýdegi, sondaı-aq «aqyldy» kásiporyndar, ǵımarattar jáne qalalar qurýdaǵy ozyq tájirıbeleri týraly aıtty. Onyń sózine qaraǵanda, qytaılyq kompanııa óziniń seriktesterimen birlesip kásiporyndarǵa sıfrlandyrýdyń kómegimen bıznesti damytýǵa, al úkimetterge basqarý sapasyn arttyrýǵa kómektesip, aqparattyq-kommýnıkasııalyq tehnologııalardy engizýde.
– Úkimetter men kásiporyndar sıfrly formatta jumys isteýge kóship, jasandy ıntellektini meńgergen saıyn aqparattyq-kommýnıkasııalyq tehnologııalardyń aldynda teńdesi joq zor múmkindikter ashyla túsedi, – dedi ol.
Bultty servıs salasynda Huawei búgingi tańda álemniń 23 aımaǵyn qamtyp, 1,5 mln-nan astam ázirleýshini qataryna tartqanyn aıta ketý kerek.
Sondaı-aq konferensııada Shenchjen qalasynyń meri Chen Jýgýı sóz sóıledi. Bul qala búgingi tańda álemniń «aqyldy» ortalyqtarynyń birine arnalý baǵytynda jumys istep jatqanyn aıta ketý kerek. Kremnıı ańǵarynyń balamasy retinde Qytaıda qolǵa alynǵan «Úlken shyǵanaq» jobasy da osy qalany qamtıdy.
– «Úlken shyǵanaq» jobasy týǵyzǵan múmkindikterdi Gýandýn, Gonkong jáne Makaomen qatar Shenchjen aımaǵy da barynsha paıdalanýǵa tyrysady. Huawei kompanııasynyń jáne basqa ozyq tehnologııalardyń artyqshylyqtaryn qoldanýdyń, sonymen qatar «aqyldy» ǵımarattardy salýdyń nátıjesinde bizdiń qalamyz kúnnen-kúnge «aqyldy» bolyp kele jatyr. 5G tehnologııasy usynǵan múmkindikterdi biz barynsha qoldaımyz, 5G-di túrli salalarǵa belsendi engizemiz, ónerkásiptik ınternetti damytamyz. Sonymen qatar shaǵyn jáne orta bıznestegi kásiporyndardyń sıfrly túrlenýine qoldaý kórsetemiz. Biz tehnologııalardyń ómirdi jaqsartatyn, qalalardy barynsha qarqyndy damytatyn áleýeti bar ekenine senemiz, – dedi ol.
Otyz jyldan astam tarıhy bar Huawei aqparattyq-kommýnıkasııalyq tehnologııalar salasyndaǵy álemdik alpaýyttardyń biri ekeni belgili. 194 myńnan astam qyzmetkeri bar kompanııa álem boıynsha 170-ten astam eldegi 3 mlrd-dan astam adamǵa «aqyldy» qurylǵy men sıfrly ınfraqurylym usyný syndy qyzmet kórsetedi.
