COVID-19: Qaı elderde saqtandyrý bar?

Byltyrǵy jeltoqsan aıynan bastap COVID-19 vırýsy álemdegi eń bas­ty máselelerdiń birine aınal­ǵany málim. Worldometers deregi boıyn­sha qaterli vırýs dúnıe júziniń 215 eline tarap, 33 mln adamǵa juqty, qur­ban bolǵandardyń sany 1 mln-nan asty. Pandemııa kezinde otandyq jáne shet­eldik ómirdi saqtandyrý kompanııa­lary jańa ónim daıyndap, iske qosýda. Freedom Finance ashyq aqparat kózderin­degi málimetterdi zertteı kele, Qazaq­stan­men qatar AQSh, Italııa, Fransııa, Túr­kııa, Lıtva, Ýkraına, Reseı, Qy­­taı, Qy­r­ǵyzstan jáne bas­qa da elderde jańa saq­tan­dyrý júıesi jasalǵanyn anyq­tady.

AQSh pandemııanyń al­ǵash­qy tolqy­ny bastalysymen qoldanystaǵy júıege COVID-19-dan jáne pnevmo­nııadan saqtan­dyrýdy en­gizdi. Sáýir aıynan bas­tap saq­tandyrý polısi bar azamattar úshin emdelý 21,9-38,7 myń dollarǵa túse­di. Bul somaǵa naýqastar emhanada 6 kúnge deıin emdele alady. Budan bólek keńes berýge 34 dollar alynatyn telemedısına servısi bar. AQSh-ta saqtandyrý polısi joq adamdar úshin stasıonarda bir apta emdelý quny 73,3 myń dollarǵa túsetinin aıta ketý kerek.

Fransııanyń Saqtandyrý­shylar federasııasy koronavırýsty kádýilgi tumaýǵa jáne basqa jıi kezdesetin res­pı­­­ra­tor­lyq aýrýlarǵa teńes­tirý­men shek­teldi. Sáıkesinshe, klıentter ýaqytsha eńbek etý qabiletinen aıyrylǵan ýaqyty úshin ǵana saqtandyrý aqysyn alady.

Pandemııa qatty órship, adam ólimi kóp tirkelgen Italııada mamandar saq­tan­dyrýdyń birqatar sharalaryn iske qosty. Mysaly, tanymal eýropalyq saq­tandyrý kompanııasy Generali kor­pora­tıvtik klıentter úshin sha­­ǵyn jáne orta bıznesti, son­daı-aq iri korporasııalardy qoldaý baǵdarlamasyn iske qos­ty. Atalǵan baǵdarlama bo­ıyn­sha saqtandyrý jaǵdaıy týyn­daǵan kezde klıentter­ge uzaq gospıtalızasııa kezin­de táýlik saıyn 100 eýro mól­sheri­nde tólenip otyrdy. Oǵan qosa jansaqtaýdan keıin klıent­ti ońaltý úshin 3 myń eýro mól­sherinde járdemaqy beriledi.

Generali saqtandyrý sharalarynan bólek, pandemııaǵa qarsy kúreske qoldaý retinde jalpy somasy 100 mln eýrodan astam qarjy bólip, Halyq­aralyq tótenshe qor qurǵanyn da atap ótken lázim. Atalǵan qarajattyń 30 mln eýrosy el halqyna kómek berýge jumsaldy. Saqtandyrý kompanııasy­nyń qyzmetkerlerine qorǵa qosqan úles retinde birneshe jumys saǵatyn tartý etý usynylyp, ony qyzmetkerler qulshyna qabyldady.

Shilde aıynda lıtvalyq saq­tandy­rýshy­lar shetelge shyǵý­shy týrısterdi COVID-19-dan saqtandyrýdy iske qos­ty. Atalǵan baǵdarlamaǵa sáıkes klıent­tiń koronavırýsqa shal­dyq­qany anyq­talsa, kompanııalar barlyq qajetti medı­sınalyq shyǵyndy óteıdi, qajet bolsa, elge qaıtý shyǵynyn da jabady. Bir aıta keterligi, saqtandyrýdyń barýǵa tyıym salynǵan elderge qatysy joq.

Túrkııada maýsym aıynda eldegi barlyq týrısterdi COVID-19-dan saqtan­dyrý júıesi engizildi. Polıs quny 13-23 eýro shamasynda, al tólenetin qarjy kólemi 2-7 myń eýro aralyǵynda qubylyp turady. 1 maýsymnan bastap eldiń barlyq avıakompanııalary men áýejaılarynda polısti onlaın resimdeýge múmkindik jasaldy.

Pandemııa bastalǵanda Ýk­raınada saqtandyrý túrine suranys óskeni anyqtaldy. Sóıtip sáýir aıynda 10-ǵa jýyq kompanııa COVID-19-dan saq­tandyrýdy iske qosty. Kompanııalar polısteriniń baǵasynda alshaqtyq kóp – 100-1500 grıvna aralyǵynda. Sáıkesinshe, tólem quny 10 myń men 120 myń grıvna aralyǵynda.

Koronavırýstan saqtandyrý júıe­si Reseıde naýryz aıynyń basynda qalyptasa bastady. Eń arzan polıs baǵasy 2 myń 500 rýblden bastalady, eń qymbaty 10 myń rýbl. Koronavırýs dıagnozy anyq­talǵan jaǵdaıda klıentke beriletin tólem 20-100 myń rýbl mólsherinde.

20 jyl buryn Qytaı aza­mat­tarynyń úshten biriniń medısınalyq saqtan­dyrýy bolǵan eken. Qazir halqy túgel­ge jýyq saqtan­dyrylǵan. Taby­syna, áleýmettik márte­besine qaramastan, ár azamat medısı­nalyq qyzmet pen sapaly em alady. Korona­vırýs paıda bol­ǵannan bastap Qytaı úkimeti barlyq naýqastyń tegin emde­letinin málimdedi. Bul sharalar halyq­ty medısınalyq kómekke ýaqtyly júginýge yntalandyrdy jáne basqalarǵa juq­tyrý qaýpin tómendetedi.

Qyrǵyzstanda osy saladaǵy kompa­nııalardyń sharttaryna sáıkes koronavırýstan 60 jasqa deıingi azamattar 180 kúndik merzimge saqtandyryla alady. Polıs baǵasy tańdalǵan baǵdarlamaǵa qaraı 2 myń somnan bastalady. Sta­sıo­narda emdelgen ár táýlik úshin 1000 som­nan 2500 somǵa deıin tólem jasalady.

Qazaqstanda COVID-19-dan jappaı saqtandyrý sáýir aıynda bastaldy. Maýsym aıynda Corona Protect baǵ­darlamasy boıynsha Freedom Finance Life ómirdi saqtandyrý kompanııasy bastapqy saqtandyrý tólemderin júzege asyrdy.

Atalǵan baǵdarlama boıynsha eń kóp saqtandyrý tólemderi Almaty men Aqtaý qalasynda tólenipti. Freedom Finance Life kompanııasynda tólem alǵan saqtandyrylǵandar ortasha eseppen – 30-50 jasta.

Corona Protect baǵdarlamasy bo­ıynsha 5 myńnan astam jeke jáne zańdy tulǵalar polıs resimdedi. Onyń polısi 6 aı boıy búkil álemde qoldanylady. Tıisti talap boıynsha klıentter emhanaǵa jatqyzylǵan jaǵdaıda qarjylyq kómek ala alady. Alda-jalda qaıtys bolǵan klıentterge tıesili saqtandyrý tólemi muragerine beriledi. Tańdalǵan paketke sáıkes saqtandyrý quny 4900 teńgeden 24 500 teńgege deıin. Al tólemderi 100 myń teńgeden 5 mln teńgege deıin barady.

Erte kóktemde pandemııanyń alǵashqy tolqyny kelisimen-aq Qazaqstannyń ishindegi jáne shet memlekettermen ara­daǵy ushaq baılanystary toqta­tylǵany belgili. Alǵashqy tolqyn ótken­nen keıin áýe reısteri qalpyna kelip, shetel­ge qydyrýshylar paıda bola bastady. Sol tusta týrıstik operatorlardyń bar­­lyǵy saıahattaýshylarǵa min­detti túrde COVID-19-dan saq­tandyrý týraly talap qoıdy. Mindetti saqtandyrý koro­navırýstyń aýyr túrin juqtyrǵan týrıstiń barlyq emdeý jáne qatynaý shyǵyndaryn jabady.