Ekologııa, geologııa jáne tabıǵı resýrstar mınıstri Maǵzum Myrzaǵalıev Birikken Ulttar uıymynyń Nıý-Iork qalasynda ótken bıoalýantúrlilik týraly sammıtinde sóz sóıledi. "Turaqty damý maqsatyndaǵy bıoalýantúrlilikti saqtaýǵa baǵyttalǵan shuǵyl sharalar", dep atalǵan jıyn BUU Bas hatshysy Antonıý Gýterreshtiń basshylyǵymen ótti. Birqatar memleketterdiń basshylary, Úkimet basshylary men músheleri málimdeme jasady.
Ekologııa mınıstri Maǵzum Myrzaǵalıev teńizge tikeleı shyǵa almaıtyn damýshy elder atynan sóıledi. О́z úndeýinde ol koronavırýs pandemııasy adamzat balasy men tabıǵat arasyndaǵy tyǵyz baılanystyń mańyzdy ekenin taǵy bir eske salǵanyn atap ótti.
"Halyqtyń ómirin qamtamasyz etý úshin teńizge tikeleı shyǵa almaıtyn elder toby bıoalýantúrlilikke qatysty sharalardy qabyldaýdy tezdetýge shaqyrady. Biz jahandyq negizdemelik baǵdarlamaǵa qatysty 2020 jyldan keıingi kezeńge arnalǵan sharalardyń joǵary dárejede qabyldanýynyń mańyzdylyǵyn jetkizgimiz keledi. Negizdemelik baǵdarlama teńizge tikeleı shyǵa almaıtyn elderdiń bıoalýantúrlilik salasyndaǵy qajettilikterin óteýi tıis", dedi mınıstr Sammıttegi sózinde.
M.Myrzaǵalıev bıoalýantúrlilikti saqtaý Qazaqstannyń eń mańyzdy ulttyq múddeleriniń biri ekenin aıtty.
"Bizdiń elimiz bıoalýantúrlilikti saqtaý jónindegi Konvensııanyń jaqtaýshysy. Aldaǵy qadamymyz – 2030 jylǵa deıingi bıologııalyq alýantúrlilikti saqtaý jáne turaqty qoldaný Konsepsııasyn qabyldaý. Qazaqstan Úkimeti turaqty damý maqsattaryn júzege asyrý úshin orman qoryn qorǵaý jáne jańǵyrtý jumystaryn júrgizýde. Erekshe qorǵalatyn aýmaqtar úlkeıip jatyr. Janýarlardyń mıgrasııasy úshin ekologııalyq dálizder jasalýda", dedi ol.
Sonymen birge M.Myrzaǵalıev qazir Memleket basshysy Qasym-Jomar Toqaevtyń tapsyrmasymen ekologııalyq ahýaldy jaqsartý úshin orman qorynda 2 mlrd, eldi-mekenderde 15 mln aǵash otyrǵyzylatynyn jetkizdi.
Aıta keteıik, BUU-nyń bul sammıtinde adamzat bıoalýantúrlilik degradasııasy áserinen bastan keship jatqan daǵdarys talqylandy. Memleketter kóshbasshylary men ókilderi 2020 jyldan keıingi kezeńde bıoalýantúrlilikti saqtaý boıynsha jasalatyn jahandyq baǵdarlamaǵa qatysty pikirlerin bildirdi. Atalǵan baǵdarlama 2021 jyly ótetin bıoalýantúrlilik týraly taraptar Konvensııasynyń 15-shi Konferensııasynda qabyldanady.
Onlaın rejimde ótip jatqan sammıtti http://webtv.un.org siltemesi boıynsha kórýge bolady.
