Akimat Live baǵdarlamasy sársenbi saıyn keshkisin ótedi. Qalyptasqan dástúr boıynsha B.Saǵyntaev qalalyqtardy KVI-ge qatysty sanıtarlyq-epıdemııalyq ahýalmen tanystyryp, COVID-19 pandemııasynyń yqtımal ekinshi tolqynyna qalanyń daıyndyǵy týraly aıtyp berdi.
Densaýlyq saqtaý júıesiniń tıimdiligin arttyrý boıynsha birqatar pármendi shara qabyldandy. Munda jedel qyzmet pen alǵashqy medısınalyq-sanıtarlyq kómektiń jumysyn kúsheıtýge basymdylyq berildi.
Bulardan ózge, kovıdti aýrýhanalardyń tósek-orny birtindep artýda. KVI-men kúreste ashylatyn medmekemelerdi eskere otyryp, 7226 oryndy oryndy 32 stasıonar daıyndalýda.
Buryn josparlanǵanyndaı, qazan aıynda jalpy qýattylyǵy 1 myń oryn bolatyn jańa medmekemeler ashylady. Mysaly, 500 oryndy RV-90 jańa ınfeksııalyq aýrýhana daıyn. 300 tósek-oryndy ekinshi modýldi ınfeksııalyq gospıtal paıdalanýǵa beriledi. Bulardan ózge, jeke ınvestısııalar esebinen 215 oryndy eki tolyqqandy kovıdti klınıkalar qurylatyn bolady.
B. Saǵyntaev ınfeksııalyq aýrýhanalarda jumys isteıtin kadrlardy daıarlaý týraly da aıtty. Qalada barlyǵy Qoǵamdyq damý basqarmasyna baǵynyshty 74 uıym, 20 respýblıkalyq jáne 93 jeke menshik medısınalyq mekemeler bar. Bul uıymdarda nebári 38 myńnan astam qyzmetker jumys isteıdi.
1 tamyzdaǵy jaǵdaı boıynsha COVID-19 emdeýge densaýlyq saqtaý júıesiniń 27 uıymy jumyldyryldy, 6200 tósek-oryn qoıyldy. Sol kezde ınfeksııalyq stasıonarlarda 4035 qyzmetker jumys istedi.
Búgingi kúni epıdemıologııalyq ahýaldyń turaqtanýyna baılanysty kópsalaly klınıkalar ózderiniń ádettegi jumys rejımine kóshti. Koronavırýs ınfeksııasyn emdeıtin ınfeksııalyq klınıkalarynda qazirgi kezde 93 naýqas bar, 400-ge jýyq dáriger, medbıke men medısınalyq qyzmetker jumys jasaýda.
Pandemııanyń jańa tolqyny paıda bolǵan jaǵdaıda 5,5 myń medısınalyq qyzmetker rezervte tur. Medısınalyq joǵary oqý oryndarynyń oqytýshylary, rezıdentteri men ıntern-dárigerler arasynan rezerv quryldy, olardyń sany 450-ge jýyq.
Jańa klınıkalardy kadrlarmen qamtamasyz etý úshin kadrlar resýrtaryn josparlaý jáne boljaý boıynsha jumystar júrýde, jańadan qosylatyn ınfeksııalyq klınıkalardyń shtattyq kestesi eseptelýde.
Mysaly, arnaıy áleýmettik qyzmet kórsetý Ortalyǵynyń bazasynda jańadan ashylǵan 500 tósektik ınfeksııalyq stasıonardyń jumys isteýi úshin shtat kestesine sáıkes 587 shtat birligi qajet, búgingi kúni onyń kadrlarmen jaraqtanýy 70%- dy quraıdy. «Halyq Arena» bazasyndaǵy klınıkada 700-den astam medısına qyzmetkeri iriktelip alyndy.
Jańadan ári jedel salynyp jatqan modýldi stasıonarǵa 300 tósek-oryn, 280-ge jýyq medısına qyzmetkeri qajet. Búgingi kúni shtattyq keste jasalýda jáne kadrlyq rezerv arasynan mamandar iriktelýde.
Búgingi kúni qalanyń medısınalyq uıymdaryna reanımatolog, ınfeksıonıst, epıdemıolog, pýlmonolog sııaqty mamandar jetispeıdi.
Sonymen qatar, qala ákiminiń málimeti boıynsha meduıymdardyń materıaldyq-tehnıkalyq bazalary aıtarlyqtaı kúsheıtildi. Máselen, 52 ÝZI apparaty, 38 rentgen, 269 О́JJ apparaty, 5 KT, 2 MRT apparaty satyp alyndy. Bularǵa qosa, kópsalaly medısınalyq tósekter, 250 tósek janyndaǵy monıtor, zerthanalyq qurylǵylardyń 43 birligi, 1050 ottegi konsentratory alyndy. Jedel járdem qyzmetiniń avtoparki 35 avtomashınaǵa jańardy, jyl sońyna deıin jedel járdemniń taǵy 100 kóligi alynatyn bolady. Birinshi eshelondaǵy segiz stasıonarǵa medısınalyq gazdyń 24 myń tósek-oryndyq ortalyqtandyrylǵan júıesi ornatylýda. 17 stasıonarda stoktardy zararsyzdandyrý, al 13-de medqaldyqtardy ýtılızasııalaý júıeleri salynýda.
Almaty ákimi B. Saǵyntaev múmkindigi shekteýli qalalyqtarǵa áleýmettik qoldaý kórsetý, jumyspen qamtýdaǵy áleýmettik baǵdarlamalardy iske asyrý jáne qoljetimdi orta qurý jóninde qoıylǵan suraqtarǵa jaýap berdi. Bulardan ózge, qala ákimi jylý maýsymynyń bastalýy, qoǵamdyq kólik, ınjenerlik ınfraqurylymdar men joldardyń salynýy týraly qoıylǵan suraqtarǵa da jaýap berdi.
Tikeleı efırdiń aldyńǵy segiz baǵdarlamasy barysynda qala ákimi qalalyqtardan túsken 129 suraqqa jaýap berdi. Bulardan ózge, telearna redaksııasyna túsken 226 suraqqa naqtyly jaýaptar berildi
