Foto: Aqorda
Prezıdenttiń aıtýynsha, qazir elimizde Kıpr kapıtalynyń qatysýymen 400-den astam kompanııa jumys istep jatyr. Olardyń 30-ǵa jýyǵy Astana halyqaralyq qarjy ortalyǵynda tirkelgen.
«Osynyń ózi elderimizdiń iskerlik jáne ınvestısııalyq baılanystary dáıekti túrde damyp jatqanyn kórsetedi. Búgin elordamyzda Qazaqstan-Kıpr bıznes-forýmy ótedi. Mańyzdy jıynǵa eki eldiń isker toptary qatysady. Kıpr kásipkerleriniń delegasııasy osy forýmǵa arnaıy keldi. Sol úshin qurmetti Prezıdent myrzaǵa zor rızashylyǵymdy bildiremin. Qazaqstan óz naryǵynda jumys isteýge nıetti Kıpr kompanııalaryna qolaıly jaǵdaı jasaýǵa árqashan daıyn. Biz Kıprdiń isker azamattaryn uzaq merzimge arnalǵan ınvestısııalyq jobalardy birlesip iske asyrýǵa shaqyramyz. Jaqynda elimizde jańa Konstıtýsııa qabyldandy. Ata zańǵa sáıkes Qazaqstanda menshiktiń barlyq túrine kepildik beriledi. Bas qujatymyz ınvestorlardyń quqyǵyn barynsha qorǵaıdy. Buǵan qosa, kıprlyq áriptesterimiz Qazaqstannyń Altyn Visa baǵdarlamasyn qoldana alady. Bul vızany alǵan kásipkerler men mamandarǵa salyq jáne kóshi-qon máselesine qatysty jeńildikter usynylady», dedi Qasym-Jomart Toqaev.
Memleketter basshylary kelissóz barysynda sıfrlyq tehnologııalar jáne ınnovasııalar salasyndaǵy yqpaldastyqqa erekshe nazar aýdarǵan.
«Kıpr tarapy Qazaqstannyń eGov júıesine jáne elimizde memlekettik qyzmetterdi sıfrlandyrýǵa qatysty jobalaryna qyzyǵýshylyq tanytyp otyr. Biz bul baǵyttaǵy tájirıbemizdi bólisýge daıynbyz. Sonymen qatar kelissózder barysynda mádenı-gýmanıtarlyq baılanystardy damytýǵa aıryqsha kóńil bóldik. Atap aıtqanda, ǵalymdar men ǵylymı mekemeler arasyndaǵy qarym-qatynasty kúsheıtýge, bilim berý, sport jáne týrızm salasyndaǵy yntymaqtastyqty nyǵaıtýǵa kelistik. Jalpy, búgingi kelissózder tabysty ótti deýge tolyq negiz bar. Biz ózara yqpaldastyǵymyzǵa tyń serpin beretin birqatar mańyzdy qujatqa qol qoıdyq. Bul kelisimder eki memlekettiń qarym-qatynasyn kúsheıte túsedi dep senemin», dedi Memleket basshysy.
Eske sala keteıik, búgin Kıpr Respýblıkasynyń Prezıdenti Nıkos Hrıstodýlıdıs elimizge resmı jumys saparymen keldi. Prezıdent mártebeli meımandy Táýelsizdik saraıynda resmı qarsy aldy.
