Foto: QSZI, telegram (arhıv)
Oqıǵanyń mán-jaıy bylaı órbigen: el turǵyndary gıbrıdti kólikterdi elge ákelmes buryn Memlekettik kirister departamentine (MKD) júgingen. Keden organdary resmı saraptama júrgizip, qozǵaltqysh qýatyn ólshep, «kedendik baj mólsherlemesi – 0 paıyz» degen resmı qujat bergen. Azamattar memleketke senip, deklarasııa toltyryp, kólikterin zańdy túrde tirkegen.
Alaıda, biraz ýaqyttan soń salyq jáne keden organdary óz sheshimderinen aınyp, «Biz qatelesippiz, endi ótken kezeń úshin mıllıondaǵan teńge tóleńizder» degen talap qoıǵan.
Memlekettik organdar bul bereshekti esepteý úshin jańa táýelsiz saraptama emes, naryqtaǵy tikeleı básekeles sanalatyn «New Energy Vehicles Kazakhstan» JShS-niń (resmı dıler) jaı ǵana hatyn negizge alǵan.
«Sheneýnikterdiń bul áreketinen 400-den astam otbasy, ıaǵnı 5000-nan astam azamat zardap shegip otyr. Memlekettik kirister organdary zańdy belshesinen basyp, zańsyzdyqtarǵa barǵan. Azamattardyń banktik shottary eshqandaı aldyn ala habarlamasyz jabylǵan. Adamdar tekserý júrip jatqanyn tek kartalary istemeı qalǵanda ǵana bilgen. Turǵyndarǵa óz qarsylyqtaryn bildirýge nemese sheshimge zańdy túrde shaǵymdanýǵa múmkindik berilmegen. Bul jaǵdaı kásipkerlikti toqyraýǵa ushyratyp, halyq arasynda eleýli áleýmettik narazylyq týdyryp otyr», dedi depýtat.
Depýtat Prezıdent alǵa qoıǵan «Zań jáne Tártip» qaǵıdatyn qorǵaý úshin Premer-mınıstrden shuǵyl shara qoldanýdy surady.
«Memlekettik kirister komıteti men óńirlik departament basshylarynyń ókilettikterin asyra paıdalaný faktileri boıynsha tekserý taǵaıyndaý kerek. Zańsyz habarlamalardyń kúshin joıyp, másele tolyq sheshilgenshe azamattardyń esepshottaryn dereý ashý qajet. Salyq organdarynyń «New Energy Vehicles Kazakhstan» JShS-ne jasandy artyqshylyqtar bergen-bermegenin anyqtaý kerek. Osy quqyqtyq ozbyrlyqqa jol bergen sheneýnikterdi qatań jaýapqa tartý qajet», dep aıaqtady depýtattyq saýalyn Abzal Quspan.
«Bul – kúshti memlekettiń kórinisi»: Depýtattar jańa raqymshylyq týraly aıtty
