Elordada shomylý maýsymy resmı túrde bastalyp, Astana qalasynyń Tótenshe jaǵdaılar departamenti sý aıdyndaryndaǵy qaýipsizdikti qamtamasyz etý jumystaryn kúsheıtti.
Qutqarýshylar Esil ózeninde kún saıyn patrýldik baqylaý júrgizip júr. Sonymen qatar qaýipti aýmaqtarda úsh mobıldi qutqarý beketi jumys istep tur.
1 maýsymda ashylady: Almaty oblysynyń jaǵajaılary shomylý maýsymyna daıyn
Turǵyndar men qala qonaqtarynyń qaýipsiz demalysyn qamtamasyz etý úshin shomylýǵa arnalǵan bes resmı oryn belgilengen. Al jabdyqtalmaǵan jáne qaýipti aımaqtarǵa shomylýǵa tyıym salynǵany jóninde arnaıy eskertý belgileri qoıylǵan.
«Sýda bolatyn jazataıym oqıǵalardyń basym bóligi shomylýǵa arnalmaǵan oryndarda tirkeledi. Sondyqtan turǵyndar men qonaqtardy tek resmı jaǵajaılarda demalýǵa, balalardy qaraýsyz qaldyrmaýǵa jáne mas kúıde sýǵa túspeýge shaqyramyz», dedi Astana qalalyq TJD Tótenshe jaǵdaılardy joıý basqarmasynyń bastyǵy Baýyrjan Ahmetalın.
Vedomstvo málimetinshe, sýdaǵy qaýipsizdik talaptaryn buzǵan azamattarǵa ákimshilik jaýapkershilik qarastyrylǵan. О́tken jylǵy shomylý maýsymynda júrgizilgen reıdter barysynda 176 ákimshilik hattama toltyrylǵan.
Tótenshe jaǵdaılar departamenti azamattardy demalys kezinde saqtyq sharalaryn saqtap, óz ómiri men jaqyndarynyń qaýipsizdigine jaýapkershilikpen qaraýǵa shaqyrdy.
