Sýret JI kómegimen jasalǵan
Depýtattyń aıtýynsha bıyl elimiz boıynsha 3,9 mıllıonnan astam oqýshy oqý jylyn aıaqtasa, onyń ishinde 215 myńnan astamy mekteppen qoshtasty. Degenmen sońǵy jyldary mektep bitirý rásimderi tárbıelik mańyzynan alystap, qymbat kólikter sherýi, sán-saltanat jarysy jáne áleýmettik jelidegi daraqylyq kórinisterimen erekshelenip keledi.
«Mektep bitirý – ár azamattyń ómirindegi mańyzdy beles. Bul kún eń aldymen bilimge qurmettiń, ustaz eńbegin baǵalaýdyń jáne jańa ómirge qadam basýdyń sımvoly bolýy tıis edi. Alaıda sońǵy jyldary mektep bitirý rásimi tárbıelik mazmunynan alystap, áleýmettik básekeniń, daraqylyqtyń jáne orynsyz dańǵazalyqtyń kórinisine aınalyp bara jatqany qoǵamdy alańdatyp otyr», dedi depýtat.
Onyń aıtýynsha, bıylǵy sońǵy qońyraý kezinde elimizdiń birneshe óńirinde qymbat avtokólikterden quralǵan kortejder uıymdastyrylyp, jol qozǵalysy erejeleri buzylǵan. Almatyda mundaı faktilerge baılanysty 21 kámeletke tolmaǵan balanyń ata-anasy jaýapkershilikke tartylǵan.
«Másele tek avtokortejdermen shektelmeıdi. Bıyl mektep bitirýshilerge arnalǵan alyp gúl shoqtary, qymbat syılyqtar men sán-saltanatty rásimder qoǵamda keńinen talqylandy. Keıbir ata-analar balasynyń qatarynan qalmaýy úshin qaryz alýǵa nemese bólip tóleýge májbúr bolǵanyn aıtyp jatyr. Bul áleýmettik jaǵdaıy tómen otbasylardyń balalaryna psıhologııalyq qysym túsiretini anyq», dedi Jarqynbek Amantaıuly.
Bir aıdan soń mektep bitirý keshi ótedi: Qymbat kesh − mártebe me, ysyrap pa?
Depýtat mundaı úrdister jas urpaq arasynda bilim men eńbektiń emes, materıaldyq qundylyqtardyń basymdyǵyn qalyptastyrýy múmkin ekenin atap ótti.
«Biz balalarǵa bilim men eńbektiń qundylyǵyn emes, qymbat kólik pen qymbat gúl arqyly mártebe kórsetýdi nasıhattap jatqan joqpyz ba? Memleket basshysy birneshe ret Zań men tártipti, adal eńbek pen qarapaıymdylyq mádenıetin qalyptastyrý qajettigin aıtty. Sondyqtan mektep qabyrǵasyndaǵy mundaı kórinisterge beıjaı qaraýǵa bolmaıdy», dedi depýtat.
Osyǵan baılanysty halyq qalaýlysy Úkimetke mektep bitirý is-sharalaryn ótkizýdiń biryńǵaı tárbıelik standartyn ázirleýdi, avtokortejder men qoǵamdyq qaýipsizdikke qater tóndiretin áreketterdiń aldyn alý tetikterin engizýdi, sondaı-aq bilim berý uıymdarynda rýhanı qundylyqtardy dáripteýge baǵyttalǵan túsindirý jumystaryn kúsheıtýdi usyndy.
Sonymen qatar Oqý-aǵartý mınıstrligine mektep bitirý mádenıetin qalyptastyrý jónindegi ulttyq tujyrymdamalyq usynystar ázirleý qajettigin jetkizdi.
Buǵan deıin atalǵan máselege qatysty Májilis depýtaty Ashat Aımaǵambetov pikir bildirip, elimizdegi kóptegen merekeniń áldeqashan «dańǵoılyq jármeńkesine» aınalyp ketkenin aıtqan bolatyn. Depýtat keıbir otbasylardyń bitirý keshine 300 myńnan bastap, bir mıllıon teńgege deıin suralatynyna shaǵymdanatynyn aıtty.
Aıta keteıik, búgin Parlament Májilisiniń jalpy otyrysynda birqatar mańyzdy zań jobalary qaralyp jatyr.
