Foto: Qaraǵandy oblysynyń ákimdigi
Balqash óńiriniń tartymdylyǵyn arttyrýǵa baǵyttalǵan festıval tórtinshi jyl qatarynan ótkizilip keledi. О́tken jyly is-sharaǵa 50 myńnan astam adam qatysqan.
Bıylǵy jyldyń basty jańalyǵy – festıval alańy jaz boıy jumys isteıtin bolady. Demalys kúnderi munda konsertter, sporttyq jarystar men túrli oıyn-saýyq is-sharalary uıymdastyrylady.
Baǵdarlama aıasynda tanymal ártister Miras Zhugunussov, AYAU, Bellucci, Domino, Nurlan & Murat jáne Qazaq Band óner kórsetedi. Sonymen qatar festıval aýmaǵynda shyǵarmashylyq jáne sporttyq aımaqtar, fýdkorttar, qolónershiler jármeńkesi, ashyq aspan astyndaǵy kınoteatr jáne otbasylyq demalys alańdary jumys isteıdi.
Uıymdastyrýshylardyń aıtýynsha, munda jaǵajaı voleıboly, armrestlıng, regata jáne jelkendi sport boıynsha sheberlik sabaqtary ótkiziledi.
«Kireberiste qonaqtardy ınteraktıvti LED-arka qarsy alady. Baǵdarlamada sondaı-aq kóbik sý shashý keshteri, jarkokross, sý taksı, PikeMan jarystary, jasandy ıntellekt jáne kraft oıyndary bar. Ekologııaǵa jáne qaldyqtardy óńdeýge erekshe nazar aýdaramyz. Strıtbasketboldan, panna-fýtboldan jáne bı batlynan týrnırler jalǵasady. Olardyń biriniń jeńimpazy kóshe bıleriniń halyqaralyq festıvalinde Qazaqstandy tanystyrý múmkindigine ıe bolady», deıdi Balkhash Tour Fest uıymdastyrýshysy Renat Almanov.
Eske sala keteıik, jaz maýsymynda Balqashqa qosymsha poıyzdar qatynaıdy. Sondaı-aq qalada rekonstrýksııadan keıin qaıta ashylǵan áýejaı óz jumysyn bastady.
