Sýretti túsirgen – Erlan OMAR, «EQ»
Májilis depýtatynyń málimdeýinshe, bıylǵy naýryz-sáýir aılarynda ońtústik óńirlerde 80-nen astam resmı oıyn tirkelgen. Alaıda elimizde «Jappaı kókpar» federasııasy qurylǵanymen, is júzinde ortaq erejeler áli de saqtalmaı keledi.
«Qatysýshynyń jas ereksheligi eskerilmeıdi, olardyń sany da shektelmeıdi. Keı jaǵdaıda 400-500 adamnan bastap 1500-2000 kókparshyǵa deıin qatysatyn oıyn ótedi. Mundaı jaǵdaıda sporttyq tártip pen qaýipsizdik talabyn saqtaý qıyn. Kókpar jylqysyn baptaý men paıdalaný tártibi de naqty rettelmegen. Atqa kúsh qoldaný, dopıng paıdalaný, ádeıi soqtyǵysý deregi jıi kezdesedi», dedi Bolat Kerimbek.
Depýtat ruqsatsyz ótkiziletin oıyndarǵa baqylaýdy kúsheıtý kerektigin aıtty.
«Osyǵan baılanysty Úkimetten jappaı kókparǵa arnalǵan qaýipsizdik standartyn zańnamalyq deńgeıde bekitip, qatysýshy sanyna, medısınalyq jáne veterınarlyq baqylaýǵa mindetti talap engizýdi suraımyz. Sondaı-aq quzyretti organdardyń jaýapkershiligin naqtylap, ruqsatsyz kókpar ótkizgen uıymdastyrýshynyń jaýapkershiligin kúsheıtýdi qarastyrý kerek dep sanaımyz», dedi ol.
Eske sala keteıik, jýyrda Aqmola oblysynda kókpar kezinde jasóspirim qaza tapty. Sporttyq is-sharany uıymdastyrýshylar jergilikti ákimdiktiń kelisiminsiz ótkizgen.
