Endi Qazaqstan astanasy men Mońǵolııanyń bas qalasy Ulan-Batyr arasynda turaqty áýe qatynasy jolǵa qoıyldy. Jańa baǵyt boıynsha reısterdi SCAT áýe kompanııasy júzege asyrady.
Ushaqtar aptasyna eki ret – seısenbi jáne juma kúnderi qatynaıdy. Reıster zamanaýı Boeing 737 MAX áýe kemelerimen oryndalady.
Kólik mınıstrliginiń málimetinshe, jańa baǵyt halyqaralyq marshrýttar jelisin keńeıtý jáne reıster sanyn arttyrý jónindegi jumystar aıasynda ashylyp otyr.
Sonymen qatar Almaty men Ulan-Batyr arasyndaǵy áýe qatynasy da jalǵasyp keledi. Bul baǵytta mońǵolııalyq Hunnu Air kompanııasy qyzmet kórsetedi. Qazirgi ýaqytta reıster aptasyna úsh ret oryndalsa, 6 maýsymnan bastap olardyń sany tórtke deıin kóbeıedi.
Osylaısha Qazaqstan men Mońǵolııa arasyndaǵy eki baǵyt boıynsha aptalyq reıster sany altyǵa jetedi. Olar – Astana – Ulan-Batyr jáne Almaty – Ulan-Batyr baǵyttary.
Kólik mınıstrliginiń málimetinshe, áýe qatynasynyń keńeıýi eki el arasyndaǵy saýda-ekonomıkalyq baılanystardy nyǵaıtyp, ınvestısııalyq yntymaqtastyqty damytýǵa, sondaı-aq týrızm men iskerlik saparlardyń artýyna yqpal etedi.
Buǵan deıin VietJet Qazaqstan kompanııasy jazǵy týrıstik maýsymda Astanadan Balqash, Úrjar jáne Úsharal baǵyttaryna sýbsıdııalanatyn ishki reıster ashatynyn habarlaǵan bolatyn.
