Májilis kýlýarynda jýrnalısterdiń suraǵyna jaýap bergen Ishki ister mınıstriniń orynbasary Sanjar Ádilov sońǵy ýaqytta qoǵamda úlken rezonans týdyrǵan jol-kólik oqıǵalary boıynsha qylmystyq ister qozǵalǵanyn aıtty.
Onyń sózinshe, Shymkent pen Astanadaǵy qaıǵyly oqıǵalarǵa qatysty Qylmystyq kodekstiń 345-babynyń 3-bóligi boıynsha qylmystyq ister tirkelgen.
«Eki fakti boıynsha da jedel túrde qylmystyq is qozǵaldy. Shymkenttegi oqıǵa boıynsha júrgizýshi ustalyp, ýaqytsha ustaý ızolıatoryna qamaldy. Qazirgi ýaqytta qajetti sot-saraptamalary taǵaıyndalyp, tergeý amaldary júrgizilip jatyr», dedi Sanjar Ádilov.
Vıse-mınıstrdiń aıtýynsha, tergeý barysynda apatqa áser etken barlyq sebepter men jaǵdaılar jan-jaqty zertteledi. Nátıjesinde quqyq buzýshylyqtarǵa yqpal etken faktorlardy joıý jóninde tıisti usynystar engiziledi.
Júk kólikteriniń qala ishinde júrýine tyıym salý máselesine toqtalǵan Sanjar Ádilov mundaı shekteýdi tolyq engizý múmkin emes ekenin jetkizdi.
«Qazirgi tańda jol qozǵalysy erejelerinde júk kólikteriniń qozǵalysyn retteıtin naqty talaptar bar. Elimizde qurylys, kommýnaldyq sharýashylyq jáne logıstıka salalary qarqyndy damyp keledi. Sondyqtan júk kólikteriniń qalaǵa kirýi men qozǵalysyna tolyq tyıym salý múmkin emes. Olar ınfraqurylymdy damytýǵa jáne kóptegen jumystardy atqarýǵa qatysady», dedi ol.
Osylaısha IIM ókilderi jol qaýipsizdigin kúsheıtý máselesi qarastyrylyp jatqanyn, alaıda júk kólikteriniń qala aýmaǵyndaǵy qozǵalysyn tolyq toqtatý josparda joq ekenin málimdedi.
