Qazaqstanda abonentter arasynda keńinen tanymal bolǵan avtoqońyraý qyzmeti kezeń-kezeńimen toqtatylady. Bul týraly Kcell jáne Beeline kompanııalary habarlady.
Kcell jáne Activ abonentteri úshin «Mıkroqońyraý» qyzmeti 30 maýsymnan bastap jumysyn toqtatady. Osy ýaqytqa deıin servıs burynǵy tártippen qoljetimdi bolady. Kompanııa ókilderiniń aıtýynsha, qazirgi tańda abonentterdiń basym bóligi messendjerlerdi, daýystyq habarlamalardy jáne basqa da sıfrlyq baılanys quraldaryn paıdalanady. Sondyqtan avtoqońyraý qyzmetine degen qajettilik aıtarlyqtaı tómendegen.
Avtoqońyraý men sheteldik nómirler arqyly jasalatyn shabýyldarǵa qashan tosqaýyl qoıylady?
Al Beeline kompanııasynyń Beep Call qyzmeti 1 shildeden bastap barlyq abonentter úshin óshiriledi. Operatordyń málimetinshe, kóptegen paıdalanýshylar ótkizip alǵan qońyraýlardan keıin keletin avtomatty qońyraýlardyń qolaısyzdyq týdyratynyn aıtyp shaǵymdanǵan.
Sonymen qatar Tele2 jáne Altel operatorlary ázirge bul qyzmetke qatysty resmı aqparat jarııalaǵan joq. Kompanııalardyń resmı saıttarynda da avtoqońyraýdy toqtatý jóninde habarlama joq.
Uıaly baılanys tarıfi 151%-ǵa qymbattady: Qyzmet sapasyna shaǵym kóbeıdi
Aıta keteıik, mamyr aıynda Qazaqstannyń Sıfrlyq damý, ınnovasııalar jáne aeroǵarysh ónerkásibi mınıstrligi baılanys qyzmetterin kórsetý qaǵıdalaryna ózgerister engiziletinin málimdegen bolatyn. Usynylǵan túzetýlerge sáıkes, avtoqońyraý qyzmetine tyıym salynyp, ótkizip alǵan qońyraýlar týraly aqparat abonentterge tek qysqa mátindik habarlama (SMS) arqyly jetkizilmek.
