Foto: Aqorda
«Memleketterimizdiń yntymaǵyn kózdegen nıetińiz úshin Sizge shynaıy rızashylyǵymdy bildirýge ruqsat etińiz. Qazaqstandyqtar Sizdi aınymas dos ári halyqaralyq deńgeıdegi bedeldi memlekettik qaıratker retinde tanıdy. Belsendi qyzmetińizdiń arqasynda ózara senim, saıası dıalog jáne yntymaqtastyǵymyz nyǵaıa tústi. Ortaq kúsh-jiger arqyly qarym-qatynasymyzǵa tyń serpin berip, jańa múmkindikterge jol ashamyz dep senemin. Qazaqstan men Kıpr arasyndaǵy yntymaqtastyqty damytýǵa qosqan eleýli úlesińizge sheksiz qurmettiń belgisi retinde Sizge I dárejeli «Dostyq» ordenin tabystaý jóninde sheshim qabyldadym. Bul orden ataýy aıtyp turǵandaı, dostyqty, Qazaqstan men Sizdiń elińizdiń arasyndaǵy qarym-qatynastyń negizi sanalatyn senim men seriktestik rýhyn sıpattaıdy. Jaýapty memlekettik qyzmetińizge tabys tileımin! Dostas Kıpr halqynyń ıgiligi men órkendeýi jolynda jetistikterge jete berińiz», dedi Qasym-Jomart Toqaev.
Kıpr Prezıdenti joǵary nagradany tabystaǵany úshin Memleket basshysyna alǵys aıtty.
«Marapatty eki el arasyndaǵy dostyqtyń nyshany retinde Kıpr halqynyń atynan qabyl alamyn. Bul – men úshin zor mártebe. Búgingi sapar perspektıvti salalardaǵy yntymaqtastyqty odan ári tereńdetý jolyndaǵy ortaq múdde men myqty saıası erik-jigerimizdi pash etedi», dedi Nıkos Hrıstodýlıdıs.
Eske sala keteıik, búgin Kıpr Respýblıkasynyń Prezıdenti Nıkos Hrıstodýlıdıs elimizge resmı jumys saparymen keldi. Prezıdent mártebeli meımandy Táýelsizdik saraıynda resmı qarsy aldy. Eki el prezıdentteri shaǵyn jáne keńeıtilgen quramda kelissóz júrgizdi.
