Shetel azamaty qazaqtyń múddesi úshin eńbek ete me?

«Jel turmasa shóptiń basy biz­diń jaqta qımyldamaıdy». 2017 jyly Shyǵys Qazaqstan oblystyq máslıhatynyń hatshysy Vladımır Golovatıýk Reseıdiń azamaty eken degen aqparat áleýmettik jelide jeldeı esken.

Saıttardyń birinde jarııa­lanǵan maqalada «1998 jyldyń 12 tamyzynda Golovatıýk Vladımır Mıhaılovıch esimdi azamat Reseı Fede­rasııasynyń «Azamattyq týraly» zańynyń 3-babynyń negi­z­inde Astanadaǵy Reseı elshi­liginiń konsýldyǵynda Reseı aza­mat­tyǵyn alady. Tıisinshe, tól­qujat rásimdemegen, tek ózge eldiń azamattyǵyn alǵan. Sóıte tura Qazaqstan azamattyǵynan bas tart­paǵan» dep jazylǵan. 

Maqala shyqty. Ulardaı shýlady el. Sonymen qosh, eshkimniń mur­tyn balta shappady. Jabýly qazan jabýly kúıinde qaldy. Al V.Golovatıýk áli kúnge deıin ob­lys­tyq máslıhattyń hatshysy. Demek, Reseı azamaty oblystyń bıligine aralasyp otyr. Álde máslıhat jumysynyń memleket­ke, memlekettik qyzmetke qaty­sy joq pa edi? Kim biledi, Vladı­mır Mıhaılovıch keıin Reseı azamat­tyǵynan bas tartqan da shyǵar. Bas tartyp, Qazaq eli úshin janyn berip eńbek etip júrse ıgi ǵoı...

Bıyl da «Jergilikti jerdegi bas­pa­sóz bıligi kimderdiń qolyn­da?», «Sheteldik azamat Shyǵys Qazaqstan oblysyn qolynda ustap keledi» degen maqalalar jelini shýlatty. Maqala shyqqanymen, resmı ókilder halyqqa lám-mım dep aýyz ashpady. Kimniń kim ekenin ashyp aıtý kerek edi.

«Jergilikti jerdegi baspasóz bıligi kimderdiń qolynda?» atty maqa­lada «Qazaqtan basqa ult ókilderi, ásirese orystar jıi qonys­tanǵan, Reseımen shekaralas Shyǵys Qazaqstan oblysynyń ıdeologııalyq jáne ishki saıasat máselesine Igor Zavgorodnıı degen sheteldik azamat (bir derekter boıynsha Ýkraınadan kelgen) «kózge kórinbeı» jetekshilik etýde» dep jazǵan.

Maqala avtory Ýkraınadan kel­gen dep jaqshaǵa alypty. Al­ Zavgorodnııdiń qolymyz­da­ bar tólqujatynyń kóshirme­si­ne úńilsek, «ÝKRAINA, M.DNIPROPETROVSK» dep kór­setil­gen. Al kerek bolsa, Ýkraına azamaty Shyǵystyń, ulttyń ıdeologııasyna aralasyp otyr. Qyzmetin «jasyryn» atqaratyndyqtan, dál qazirgi ýaqytta onyń attan túsken-túspegenin dóp basyp aıtý qıyn.

Qalaı degenmen, memlekettiń ishki saıasatyna, ıdeologııasyna jat eldiń azamatyn aralastyrý aqylǵa qonbaıdy. Túptep kelgende qazaqtyń tiline, diline, dinine qazaqtyń ǵana jany ashıdy. Sheteldiń azamaty she, qazaq halqynyń múddesi úshin eńbek etedi deısiz be?

Shyǵys Qazaqstan oblysy