"Prezıdent jemqorlyqqa qarsy reformalardyń alǵashqy paketin ótken jyldyń mamyrynda jarııalady. Tikeleı baǵynyshty qyzmetkerdiń jemqorlyǵy úshin basshylardyń jaýapkershiligi ınstıtýty retteldi. Qarastyrylyp otyrǵan kezeńde (sońǵy eki aptada – avt.) aýdandyq jáne oblystyq deńgeıdegi 9 ákim otstavkaǵa ketý týraly ótinish berdi. Altaýy jumystan shyqty", dep habarlady búgin Sybaılas jemqorlyqqa qarsy kúres agenttiginiń ókilderi.
Derekkózge súıensek, Sátbaev qalasynyń ákimi Ydyrysovtyń jáne Almaty oblysy Panfılov aýdany ákimi О́mirálıevtiń otstavkalary qabyldanbaǵan. Oblys ákimderi olarǵa "sógis" jarııalaǵan.
"28 qyrkúıekte Qostanaı oblysy Rýdnyı qalasynyń ákimi Ǵaıazov otstavkaǵa ketti, ol bul qyzmetti 2011 jyldan beri atqaryp keledi. Buǵan deıin habarlanǵandaı oǵan tikeleı baǵynyshty Rýdnyı qalasy Qashar kentiniń ákimi Aldonǵarovqa qatysty úkim zańdy kúshine endi. Sonymen qatar, Atyraý oblysy Qurmanǵazy aýdanynyń ákimi Nurtaevtyń otstavkaǵa ketý týraly ótinishi qaralyp jatyr. Onyń orynbasary Tájibaev sottaldy", deıdi agenttik ókili.
Jalpy, Agenttiktiń 1-shi departamentiniń asa mańyzdy ister jónindegi aǵa tergeýshisi Danııar Bıgaıdarov habarlaǵandaı, eki apta ishinde Qazaqstanda jemqorlyqqa qatysy bar 3 laýazymdy tulǵa ustalǵan. Osy aralyqta 3 laýazymdy tulǵa ustalǵan, 2 tulǵaǵa qatysty "kúzetpen ustaý" , 3 adamǵa qatysty "úıqamaq" bultartpaý sharasy qoldanyldy.
