Bas merdiger – «Dorstroı» jaýapkershiligi shekteýli seriktestigi qazir termınaldarda árleý jumystaryn júrgizip jatyr. Búginge deıin ınjenerlik júıeler tolyqtaı tartylǵan. Jaıaý jetý galereıalaryn salý sharalary da aıaqtalýǵa taıaý. Budan bólek, abattandyrý jumystary qarqyn alǵan. Jańa ınspeksııalyq-tekserý kesheniniń qurylysy da támámdalypty. Qazirde paıdalanýǵa berý jumystary júrgizilýde.
Aıta keteıik, ótkizý beketin rekonstrýksııalaýdan keıin joldyń qozǵalys bóligi 137 metrge deıin keńeıip, 8 jolaqty bolmaq. Joba aıasynda ótkizý termınaldaryn, BО́P, shekaralyq qyzmet nysanyn jáne ótkizý beketine qarasty ózge de nysandardy qaıta jańartý kózdelgen.
Nysanda 172 bilikti maman men arnaıy tehnıkanyń 16 birligi jumyldyrylǵan. Tehnıkalyq baqylaýdy «Almaty Sapa Injınırıng» JShS júrgizýde.
Rekonstrýksııalaý jumystary bastalǵaly ótkizý beketi tek jaıaý júrginshiler úshin jumys istep keledi. Adamdardy ótkizý tańǵy 06:00-24:00 aralyǵynda júzege asýda. Avtokólikter bolsa, shekaradan tek jaqyn jatqan ótkizý pýnktteri arqyly óte alady.
Jumystar bıylǵy jeltoqsanda aıaqtalmaq. Jańartýdyń arqasynda «Qordaıdyń» ótkizý múmkindigi ulǵaıady dep kútilýde. Pýnktten táýligine 2500 avtokólik jáne 23 myń adam ótedi dep boljanyp otyr.
