Jasyl jeleńdi jalpy aýmaǵy 552 gektar aýmaqqa otyrǵyzý kózdelgen. Jabyq tamyrly júıe ádisimen qaraǵaı kóshetterin ósirý zamanaýı stansanyń tyń tehnologııalary arqyly júzege asady. О́rt oshaqtary Besqaraǵaı aýdanynyń 6 iri fılıalynda bolǵandyqtan, keshen osy aýdan aýmaǵynda salynǵan. Munyń tıimdi tusy – jumysshylar kóshetti alysqa tasymaldap, tamyryn búldirmeıdi.
Tarydaı tuqym alyp qaraǵaıǵa aınalǵansha ormanshylardyń qadaǵalaýynda, kútiminde bolady. Mundaǵy baǵbandar kóshet tuqymyn zalalsyzdandyryp baryp avtomattandyrylǵan túrde arnaıy ydystarǵa sebedi. Jylyjaıdaǵy kóshetter 10-12 apta erekshe kútimde turyp tamyrlanady. Jumysshylar aýa temperatýrasyn, ylǵaldylyqty únemi nazarda ustap otyrady. Olar qyltıǵan kóshetterdi sýaryp qana qoımaı, mıneraldy tyńaıtqyshtar da qoldanady. Tamyrlandy-aý degende baryp, qaraǵaı óskinderin arnaıy ashyq alańǵa shyǵarady. Jasyl jelekter ashyq jerde, jeldiń ótinde, jaýyn-shashynda jergilikti tabıǵatqa beıimdeledi. Sodan keıin baryp qana belgilengen jerlerge otyrǵyzylady.
Jabyq tamyrly júıe ádisimen ósirilgen kóshetterdiń sapasy dástúrli tásilmen ósirilgen ekpe kóshetterinen edáýir joǵary eken. Sebebi otyrǵyzý kezinde tamyr júıesi buzylmaıdy. Tamyr júıesi buzylmaǵan soń dalaly jerge tez beıimdelip ketedi. «Semeı ormanshylyǵynda» bul tásil 2016 jyldan beri qoldanylyp keledi. Jabyq tamyrly júıemen alynǵan kóshetter 18,7 gektar órtelgen alqaptarǵa otyrǵyzyldy. Bul kóshetterdiń 76%-y jerge beıimdelip, tamyr jaıyp ketken.
Mamandardyń pikirinshe, órtengen jerdi qalpyna keltirýdiń birden-bir tıimdi tásili osy – jasandy jolmen qaraǵaı kóshetterin egip shyǵý. Esep-qısap boıynsha, 1 gektarǵa mólshermen 3700-4200 dana kóshet otyrǵyzylady. Mundaı ıgi jumys jyl saıyn jalǵasyn taba bermek.
Shyǵys Qazaqstan oblysy
