Tujyrymdama boıynsha parkte zamanaýı 3 vızıt-ortalyq, glempıng, kempıng etnoaýyl salyp, karavanıngke arnalǵan oryndar daıyndaý kózdelgen. Bul rette týrıstik marshrýttar men soqpaqtardy damytýǵa basty nazar aýdarylady. Aımaqta kúrdeli qurylystyń ornyna jeńil konstrýksııalar qoldanylady.
«Kólsaı kólderi» ulttyq memlekettik tabıǵı parkiniń dırektory Danııar Turǵanbaev mundaǵy ekotýrızmge arnalǵan ınfraqurylym qorshaǵan ortaǵa zııan keltirmes úshin negizgi kólderden alys bolatynyn aıtty. «Qaıyńdy, Kólsaı kólderine birde-bir nysan jaqyn salynbaıdy. Ǵımarattardyń bári tómen ornalasady. Shatqaldyń ishine kirmeıdi. Bul – tabıǵattyń suranysy, qajettiligi eskerilip jasalǵan tujyrymdama. Konsepsııanyń basty maqsaty – ekojúıeni buzbaý. Adamdar jaıaý nemese velosıpedpen júrip, tabıǵatqa zııan tıgizbeı demalatyn jaǵdaıǵa kelýimiz kerek. Taǵy bir maqsatymyz – eldi meken turǵyndaryn jumyspen qamtý. Tek iri bıznes ókilderi emes, jergilikti halyq ta týrızmniń paıdasyn kórýi tıis»,
dedi D.Turǵanbaev.
Týrızmdi damytýdyń memlekettik baǵdarlamasyna sáıkes, ekotýrızm jobalary da 2020 jyly nátıjesin bere bastaýy tıis. «Aldyn ala esepteýler boıynsha týrıstik marshrýttardyń sany artady, jergilikti turǵyndar úshin jańa jumys oryndary paıda bolady, qonaqúı qory keńeıedi jáne shatyrlar men lagerler úshin kóbirek oryn bolady. Bul rette tabys jylyna 150 mln teńgege deıin ósedi», dedi «Kólsaı kólderi» ulttyq memlekettik tabıǵı parkiniń Bas dırektory Danııar Turǵanbaev.
«Damý tujyrymdamasyn parktiń janynan qurylatyn Qoǵamdyq keńeske shyǵaramyz. Sol keńes jan-jaqty qarap, talqylap bolǵan soń ári qaraı zańǵa sáıkes áreket jasaımyz. Úlken ınvestısııalyq joba arqyly nysandar paıda bolady. Tujyrymdamany erteń bıznes ókilderi ınvestısııalyq jobamen kelgende bizdiń talaptardy tolyq túsinsin dep jasap jatyrmyz. Baıqaýǵa qatysqan kásipker bizdiń tujyrymdamadaǵy ıdeıa bolǵan jaǵdaıda ǵana jumys isteýge múmkindik alady», dep eskertti Ekologııa, geologııa jáne tabıǵı resýrstar vıse-mınıstri Erlan Nysanbaev.
Osy saladaǵy otandyq mamandardyń pikirinshe, aldaǵy jyldary Qazaqstanda ekotýrızmge degen qyzyǵýshylyq kúrt artady. Kazakh Tourism ulttyq kompanııasynyń Basqarma tóraǵasy Erjan Erkinbaev ta osy pikirdi qýattaıdy. «Bul tyńǵylyqty jasalǵan tujyrymdama. Ony Premer-Mınıstrdiń jáne Ekologııa, geologııa jáne tabıǵı resýrstar, Mádenıet jáne sport mınıstrleriniń tapsyrmasymen ulttyq parktiń barlyq shatqaldaryn birneshe ret aralap shyǵyp, uzaq ýaqyt daıyndadyq», dedi E.Erkinbaev qoǵam ókilderi qatysqan jıynda.
Ol BUU-nyń Búkilálemdik týrıstik uıymy aýyldyq jáne ekologııalyq týrızmdi osy jyldyń urany etip alǵanyn atap ótti. Sebebi pandemııa áserinen ekotýrızm jahandyq týrızm úlesiniń 30%-yn quraǵan.
«Ekotýrızm bizdiń elimizdegi týrızm salasynyń eń keleshegi zor baǵyty. Memleket jeriniń 10%-y – erekshe qorǵalatyn aýmaqtar. Ekotýrızmge ınfraqurylym salyp, jaǵdaı jasasaq ta, jasamasaq ta ol jaqqa baratyn adamdar sany jyl saıyn kóbeıe beredi. Sondyqtan eger týrızmdi durys uıymdastyrmasaq, ekojúıege túsetin antropogendik júkteme artyp, bıoalýantúrlilikke qaýip tónedi. Jańa marshrýttar ashpasaq, qazirgi bar oryndarǵa zııan keledi», dep túsindirdi ol.
Sondyqtan tujyrymdama boıynsha ulttyq parkke kelgen týrıster burynǵydaı Kólsaı, Qaıyńdy kólderiniń jaǵasynda uzaq bógelmeıdi. Joba jeke ınvestor tartý arqyly júzege asady. Onyń jumysyn, talapqa saı jumys isteýin «Kólsaı kólderi» ulttyq parkinde ekotýrızmdi damytý boıynsha qurylatyn qoǵamdyq keńes baqylaıdy. Bas josparǵa sáıkes 2025 jylǵa qaraı «Kólsaı kólderine» keletin týrıster sany 5 ese artady degen boljam bar. 2019 jyly ulttyq park 87 myń adam qabyldaǵan.
