Aımaqta Qazaqstan Respýblıkasynyń týrıstik salasyn damytýdyń 2019-2025 jyldarǵa arnalǵan memlekettik baǵdarlamasyn iske asyrý aıasynda «Mańǵystaý týrıstik aımaǵy» is-sharalar josparyn júzege asyrý jumystary júrgizilip jatyr. 2018 jyly Elbasy N.Nazarbaevtyń Aqtaý zamanaýı teńiz kýrortyna aınalýy tıis degen tapsyrmasynan keıin, týrızm damýyna asa zor kóńil bólinip, óńirdiń ınjenerlik-kólik ınfraqurylymyn damytý jumystary júrgizilýde.
Mańǵystaý oblystyq ınvestısııalar jáne týrızmdi damytý basqarmasy basshysynyń orynbasary T.Edigeevtiń aıtýynsha, 2020 jyldyń 1-jartyjyldyǵynyń qorytyndysyna sáıkes Týrızm salasy boıynsha negizgi kapıtalǵa salynǵan ınvestısııa kólemi 67,0 mlrd teńgeni quraǵan. Álemdik brendterdiń qyzyǵýshylyǵyn, memlekettiń qoldaýyn sezingen jergilikti kásipkerler «Jyly jaǵajaı» aýmaǵynda ınvestısııa kólemi 30,5 mlrd teńgeni quraıtyn jańa «Flamıngo Rezort» demalys bazasyn qaıta qurylymdaý, «Nur» 5 juldyzdy kópfýnksıonaldy emdeý-dıagnostıkalyq jáne saýyqtyrý kesheni qurylysy, «Assyl Aktau» termaldy jyly sýymen demalys bazasynyń qurylysy jáne «Seaside Palace» demalys aımaǵynyń qurylysy syndy tórt týrıstik jobany iske asyrýǵa kiristi.
Sonymen qatar demalýǵa kelgen qonaqtar tek qonaqúı aýmaǵynda qalyp qoımaı, ólkeniń kóz tartymdy jerlerin, tabıǵatyn, tarıhı-mádenı, týrıstik nysandaryn tamashalaý úshin týrıstik marshrýttar anyqtaldy. О́lkeniń kórkin tamashalaýshylar úshin birinshi Qaraqııa aýdany boıynsha «Bozjyra» shatqaly baǵyty, ekinshi Túpqaraǵan aýdany boıynsha «Sartas» baǵyty usynylsa, úshinshi baǵyt bolyp Mańǵystaý aýdanyndaǵy «Kógez etnoaýyly» baǵyty tańdaldy.
Qazirgi tańda Aqtaý qalasynyń «Jyly jaǵajaı» aýdanyndaǵy teńiz kýrorttyq aımaǵyn elektrmen jabdyqtaý jumystary júrgizilýde. Jobaǵa sáıkes birinshi kezekte 2020 jyly PS-110/10kV «Baza otdyha» qosalqy stansasyndaǵy 1h2,5 MVA qýattyq transformatorlaryn 2h16 MVA transformatorlaryna aýystyrylyp, uzyndyǵy 10,5 km 10kV elektr jelisiniń qurylysy aıaqtaldy. Ekinshi kezekte 2021 jyly ońtústik baǵytta PS-110/10kV «Demalys aımaǵy» qosalqy stansasynan uzyndyǵy 10,3 km 10 kV elektr jelisi salynady.
Aqtaý qalasynyń «Jyly jaǵajaı» aýdanyndaǵy teńiz kýrorttyq aımaǵynyń sýmen, gazben jabdyqtaý júıeleriniń qurylysy júrgizilýde. Sýmen jabdyqtaý boıynsha jobada jalpy uzyndyǵy 56 shaqyrym sý qubyrlary jelisiniń jáne 65 qudyqtyń qurylysyn salý qarastyrylǵan. Qazirgi tańda 48 shaqyrymyna transheıa qazý jumystary júrgizildi, 48 shaqyrymyna sý qubyry jelisi júrgizildi.
Aqtaý qalasynan Kaspıı teńiziniń jaǵalaýy boıyndaǵy Quryq parom keshenine deıingi ýchaskedegi teńiz kýrortyn damytý jumystary júrýde. Jobaǵa sáıkes teńiz jaǵalaýyndaǵy ınfraqurylymdy damytý boıynsha jalpy quny 17,8 mlrd teńgeni quraıtyn 70,8 shaqyrymdy qamtıtyn 5 joba jasaqtaldy. Búgingi tańda jalpy quny 11,2 mlrd teńgeni quraıtyn úsh joba boıynsha jumystar júrgizilýde.
О́ńirdegi týrızm salasyn damytý úshin ózekti máseleler, usynystar men eskertýler boıynsha jasalatyn jumystar anyqtalyp, aımaqta týrızm salasyn damytýdyń Jol kartasyn jasaqtaý qajettigi týyndap otyr.
Mańǵystaý – týrızmdi túletý úshin múmkindigi mol óńir. Biraq týrızmmen tartý úshin de, týrızm salasyn damytqan óńir retinde tanylý úshin de áli talaı jumys, áli talaı ýaqyt qajet ekendigi de belgili.
Mańǵystaý oblysy
