Sýretti túsirgen avtor
«Qazaqstan Turǵyn úı qurylys jınaq banki» AQ oblystyq fılıalynyń dırektory Nazıgúl Akkýlova «Shańyraq» («5-10-20») baǵdarlamasy boıynsha jeńildetilgen paıyzben baspana alýdyń tıimdi joldaryn aıtyp berdi.
«Nurly jer» memlekettik baǵdarlamasynyń jańa baǵyttarynyń biri bolyp tabylatyn «Shańyraq» («5-10-20») qanatqaqty jobasyn «Turǵyn úı qurylys jınaq banki» júzege asyrady. Bul joba Prezıdent Qasym-Jomart Toqaevtyń tapsyrmasy boıynsha qolǵa alynǵan. Tyń jobanyń negizgi maqsaty – qazaqstandyqtardy tıimdi zaım berý arqyly baspanamen qamtamasyz etý.
Qarapaıym halyq úshin bul baǵdarlama óte tıimdi kórinedi. Bank qyzmetkerleriniń aıtýynsha, nesıeniń jyldyq mólsherlemesi bes paıyzǵa teń. Alaıda baspanaly bolýǵa nıetti adam turǵyn úı qunynyń kem degende 10 paıyzyn depozıtke jınaý qajet. Al nesıelendirý merzimi – 20 jyl.
Nazıgúl Akkýlovanyń málimetine súıensek, atalǵan baǵdarlama arqyly kez kelgen adam úı ala almaıtyn kórinedi. Baǵdarlama boıynsha jeńildikpen nesıe alý jónindegi ótinishti 1986 jyldan bastap 2015 jylǵa deıin jergilikti ákimdikterde baspanaǵa muqtaj azamat retinde tirkelgen qazaqstandyqtar bere alady eken.
О́tinishterdi qabyldaý merzimi aıaqtalǵannan keıin, banktiń «Shańyraq» jobasyn odan ári nesıelendirýge qajetti qarajaty bolǵan jaǵdaıda, baǵdarlamanyń ekinshi kezeńine ákimshilik kezegine keıingi jyldary turǵan azamattar da shaqyrylýy múmkin.
Sondaı-aq baǵdarlamaǵa qatysý úshin sońǵy alty aı ishindegi otbasynyń ár múshesine keletin tabystyń bir aılyq kólemi 3,1 kúnkóris mınımýmynan (2020 jyldyń 1 sáýirinen bastap KM – 32 668 teńgege teń) aspaýy talap etiledi. Oǵan eńbek jáne kásipkerlik qyzmetten túsetin kiristi (zeınetaqy aýdarymdaryn, jeke tabys salyǵy men basqa da mindetti aýdarymdardy eseptemegende) jatqyzýǵa bolady. Demek, 2020 jyly otbasynyń ár múshesine keletin tabys mólsheri 101 271 teńgeden artyq bolmaýy tıis.
– О́zderińizge belgili bolǵandaı, bul baǵdarlama boıynsha tek bastapqy naryqtaǵy, ıaǵnı jańadan salynǵan turǵyn úılerdi ǵana satyp alýǵa bolady. Úmitkerler atalǵan baǵdarlama boıynsha salynyp jatqan úılerdiń tizimin «hcsbk.kz» saıtynan kóre alady, – dep túsindirdi Nazıgúl Akkýlova.
Qazirgi ýaqytta Shyǵys Qazaqstanda «5-10-20» baǵdarlamasy boıynsha alty turǵyn úıdiń qurylysy júrip jatyr. Máselen, О́skemende 64 páterli tórt úı men 72 páterli bir turǵyn úı boı kóterýde. Taǵy bir úı Ulan aýdanynda salynyp jatyr. Bolashaqta onda 80 otbasy qonystoıyn toılamaq. Bul nysan aǵymdaǵy jyldyń qarasha aıynda qoldanysqa beriledi dep josparlanýda. Al oblys ortalyǵyndaǵy úılerge 2021 jyly qonystanýǵa bolady.
Jergilikti ákimdikter salǵan nesıelik turǵyn úılerdiń bir sharshy metri óńir turǵyndary úshin 160 myń teńgeden satylady. Shyǵys Qazaqstan oblysynda atalǵan baǵdarlama boıynsha boı kótergen baspananyń baǵasy 12 mln teńgeden aspaýy tıis eken.
– Ákimdik kezeginde turǵan azamattar oǵan qatysýǵa ótinish bildirý úshin «hcsbk.kz» saıtyna tirkelýi qajet. О́tinishterdi qabyldaý merzimi 17 qyrkúıekten 16 qazanǵa deıin jalǵasady. Eger saıt arqyly ótinish berý qıyndyq týǵyzsa nemese basqa da suraqtar mazalasa, bank bólimshesine barýǵa bolady. Tipti bolmasa, banktiń keńesshisimen habarlasa alasyzdar, – dedi N.Akkýlova.
Al baspanaly bolý úshin ótinish beremin deseńiz, birinshi qadam – hcsbk.kz veb-saıtyndaǵy «Qoljetimdi baspana»/«Shańyraq» qanatqaqty jobasynyń bólimine kirip, elektrondy ótinim berýge bolady. Úsh kún ishinde ótinish berýshige bank qyzmetkeri habarlasyp, nesıe sharttary, baǵdarlama talaptary týraly egjeı-tegjeıli aıtyp beredi. О́tinish berýi úshin fılıaldyń esebine tirkep qoıady.
Budan soń tólem qabilettigin baǵalaý úshin ótinish berýshi qajetti qujattar paketimen bank bólimshesine barýy tıis. Eger oń sheshim qabyldansa, banktiń talaptaryna sáıkes keletin qurylysshylardan baspana taýyp, kelisimdi bekitýi qajet.
Kelesi qadam – bankten nesıe alý. Joǵaryda aıtqanymyzdaı, nesıe ótinish berýshiniń jınaq shotynda qajetti somanyń 10 paıyzdan kem emes mólsheri bolǵan kezde ǵana beriledi.
Ákimshilik kezegine qaı ýaqyttan bastap esepke turǵanyńyzdy eGov.kz saıty arqyly nemese jergilikti atqarýshy bılik organdarynan bilýge bolady.
Betti daıyndaǵan
Mereı QAINARULY,
«Egemen Qazaqstan»
Shyǵys Qazaqstan oblysy
