«Astana» – «Kaspıı» – 1:2
Týrdyń alǵashqy oıyny «Astana» men chempıonat debıýtanty «Kaspıı» arasyndaǵy sensasııalyq matchpen bastaldy. Fýtbol mamandary, tipti qarapaıym jankúıerler bul týrda elimizdiń alty dúrkin chempıony esh qıyndyqsyz jeńiske jetedi dep oılaǵan-dy. О́ıtkeni ótken týrda «Astana» 3:0 esebimen Taldyqorǵannyń «Jetisý» komandasynyń tas-talqanyn shyǵarǵan. Al «Kaspıı» «Shahterden» 2:1 nátıjesimen jeńilgen. Biraq fýtbolda bári kútken nátıje bola bermeıtini taǵy bar. «Kaspıımen» bolǵan oıynda match boıy ústemdik tanytqan «Astana» birinshi taımnyń 37-mınýtynda Rýnar Mar Sıgýronsson soqqan goldyń arqasynda esepte alǵa shyqty. Matchtyń ekinshi bóliginde de oıyn elorda klýbynyń baqylaýynda bolǵan. Alaıda ekinshi taımnyń orta tusyna jetkende «Kaspıı» aınaldyrǵan 4 mınýtta «Astana» qaqpasyna eki gol soǵyp, bıylǵy birinshilikke tek upaı taratý úshin qatysyp jatpaǵanyn dáleldedi. Matchtyń 71-mınýtynda Bılıal Sebahı esepti teńestirse, 75-mınýtynda Maksım Marýsıch komandasyna mańyzdy úsh upaı syılady. Jankúıerlerdiń esinde bolsa, birinshi aınalymda da «Kaspıı» óz alańynda «Astanaǵa» ońaılyqpen upaı bermeıtinin ańǵartqan-dy. «Astana» syrt alańda 3:2 esebimen áreń jeńiske jetken edi.
«Qaırat» – «Shahter» – 1:1
«Astana» upaı joǵaltqan soń chempıonatta top bastap kele jatqan «Qaıratqa» týrnır kestesindegi eń jaqyn básekelesinen uzaı túsýge tamasha múmkindik týyp edi. Biraq Almatynyń komandasy ońtaıly sátti tıimdi paıdalana almady. «Shahtermen» synǵa túsken «Qaırat» 1:1 esebimen teń oınady. Birinshi taımda eki komanda da gol soǵýǵa tyrysqanymen, birde-bir fýtbolshy qaqpa sańlaýyn taba almady. Tek ekinshi taımnyń 64-mınýtynda ǵana alǵashqy gol soǵyldy. Bul joly 36 jastaǵy brazılııalyq ardager fýtbolshy Vagner Lav esepti ashty. «Qaırattyń» jeńisimen aıaqtalýǵa jaqyn qalǵan oıynda «Shahter» quramynan Aıdos Táttibaev mergendigimen kózge túsip, 82-mınýtta esep aıyrmasyn teńestirip ketti. Osylaısha, eki klýb bir-bir upaı oljalady.
«Qaısar» – «Oqjetpes» – 0:0
Keıingi tórt týrda birdeı nátıje kórsetip kele jatqan (4 oıynnyń ekeýinde teń túsip, ekeýinde jeńilgen) «Qaısar» men «Oqjetpes» klýbtary bul joly da statıstıkalaryna pálendeı ózgeris engizgen joq. 90 mınýt boıy úsh upaıǵa taıtalasqan eki klýb match sońynda 1 upaıǵa razy bolyp, teń tarqasty.
«Ordabasy» – «Taraz» – 1:1
Bıylǵa josparlanǵan ońtústik derbıiniń ekinshi kezdesýinde jeńimpaz komandanyń esimi anyqtalmady. «Ordabasy» men «Taraz» arasyndaǵy matchta gol sany az boldy demeseńiz, oıyn ádettegideı tartysty ótti. Kezdesýdegi esepti 56-mınýtta «Taraz» oıynshysy Goran Brkıch ashty. Al 77-mınýtta «Ordabasynyń» qorǵaýshysy Vıktor Dmıtrıenko esepti teńestirip, komandasyn jeńilisten qutqaryp qaldy. Bul matchta «Tarazdyń» shabýylshysy Serj Nıýıadzı da gol soqqan, biraq Aıdyn Rahymbaev bastaǵan tóreshiler gol oıynnan tys jaǵdaıda soǵyldy dep eseptemeı qoıdy. Eki ujymnyń arasynda ótken alǵashqy kezdesýde «Taraz» 3:2 esebimen basym túsken-di.
«Tobyl» – «Jetisý» – 2:0
«Qaırat» pen «Ordabasynyń» upaı joǵaltqanyn, «Astananyń» jeńilgenin Qostanaıdyń «Tobyly» tıimdi paıdalanyp ketti. «Jetisý» komandasymen ótken oıynda 2:0 esebimen jeńiske jetken Grıgorıı Babaıannyń shákirtteri 20 upaımen týrnır kestesinde úshinshi orynǵa kóterilip, chempıondyq talasqa qosyldy. «Tobyldyń» eki golyn ekinshi taımda legıonerler Djaba Kankava men Jeremı Manzorro soqqanyn aıta keteıik.
«Qaırat» – «Astana» – 3:0
Jeksenbi kúni el chempıonatynyń altynshy týrynda keıinge shegerilgen «Qaırat» pen «Astana» arasyndaǵy «El-klasıko» matchy ótti. Kezdesýdiń alǵashqy 20 mınýtynda «Astana» fýtbolshylary táýir oıyn kórsetti. Biraq múmkindikterin sátti paıdalanǵan «Qaırat» oıynshylary birinshi bolyp esep ashty. 24-mınýtta qyrǵyzstandyq Gúljigit Alyqulov gol soǵyp, komandasyn alǵa shyǵardy. Almatylyqtar ekinshi taımdy da qarqyndy bastady. Alǵashqy bes mınýttyń ishinde eki gol soǵyp, oıyn taǵdyryn sheship tastady. Aldymen 46-mınýtta Aıbol Ábiken Alyqulovtyń pasynan keıin kózge tússe, 49-mınýtta «Astana» qorǵaýshysy Radakovıch óz qaqpasyna gol soǵyp aldy. Bul sátte de soqqyny Gúljigit jasaǵan edi. Osylaısha, birinshi «El-klasıko» matchy «Qaırattyń» jeńisimen aqtaldy. Bul oıynnan keıin «Qaırat» týrnır kestesinde 29 upaımen jeke-dara kósh bastady. Al ekinshi orynda turǵan «Astananyń» enshisinde 21 upaı bar.
