Baıqaý qorytyndysy Mádenıet jáne sport mınıstrliginiń uıytqy bolýymen ásem festıvalǵa ulasyp, kózi tirisinde Nurǵısa Atabaıulynyń ózi qurǵan «Otyrar sazy» orkestri daryn ıesiniń eń tanymal kompozısııalaryn áýelete oryndady.
Bir aıǵa sozylǵan respýblıkalyq án men kúı saıysyna qatysýǵa nıet bildirgen jastardyń deni kásibı mýzykanttar. Sondyqtan da baq synaǵan ónerpazdardyń arasynan kil myqtyny anyqtaý ońaıǵa soqpaǵan. Qazylar alqasynyń sheshimimen Tilendıev shyǵarmalaryn naqyshyna keltire oryndaǵandar bir týrdan kelesi týrǵa joldama alyp otyrǵan. Festıval aıasyndaǵy barlyq is-sharalar onlaın formatta ótkendikten qatysýshylar óz ónerlerin beınebaıan túrinde pash etti.
Qazylar alqasynyń sheshimi boıynsha, «Dombyra» atalymyndaǵy 1-oryn Dastan Qazkenovtiń, 2-oryn Erasyl Rınatov pen Arsen Tursynovtyń, al júldeli úshinshi oryn Raýan Jeksembi men Ertis Saıyrhan esimdi jas kúıshilerdiń enshisine buıyrdy.
«Vokal» atalymynda Gúldana Aldadosova men Áıgerim Altynbek top jarsa, ekinshi orynǵa Tólegen Rahymbaev, Dinmuhamed Kóshkinbaevtar ıe boldy. Aıtýly baıqaýdyń úshinshi tuǵyrynan kóringen qos ónerpaz Ásem Áýbakirova men Symbat Tasbergenova kópshiliktiń yqylasyna bólendi. Sondaı-aq Tilendıevter otbasy taǵaıyndaǵan arnaıy syılyq Nurdáýlet Saǵatbekke tabystaldy.
Án men kúıdiń aıdyny shalqyǵan dodaǵa Qazaqstannyń eńbek sińirgen ártisi Jeksembek Nurjaýov, Qazaqstannyń eńbek sińirgen qaı̆ratkerleri Ermurat Úsenov, Jámıla Baspaqova, Dına Hamzına, Dinzýhra Tilendıeva syndy óner maıtalmandary qazylyq etti.
Jeńimpazdardyń qatysýymen ótken gala-konsertti kórermender Jambyl atyndaǵy Qazaq memlekettik fılarmonııasynyń You Tube arnasynan tamashalady.
– Biz bul festıvalge uzaq ýaqyt daıyndaldyq. Bastapqyda Respýblıka saraıynda, Opera teatrynda ótkizemiz dep oılaǵan edik. Biraq pandemııaǵa baılanysty onlaı formatta ótkizýge týra keldi. Vokal men dombyra atalymdary boıynsha uıymdastyrylǵan baıqaý joǵary deńgeıde saltanat qurdy dep aıta alamyz. Al qorytyndy konserttik baǵdarlamada ákemniń halyqqa keńinen tanymal emes týyndylaryn kóbirek oryndaýǵa tyrystyq. Árıne, tanymal týyndylary da shyrqaldy, – deıdi «Otyrar sazy» orkestriniń bas dırıjeri Dinzýhra Tilendıeva.
Aıtýly baıqaý óskeleń urpaqty kompozıtordyń shyǵarmashylyǵymen sýsyndatý, ulttyq mýzykalyq muraǵa degen yntalaryn oıatý maqsatynda qolǵa alynǵanyn aıtqan Jambyl atyndaǵy Memlekettik fılarmonııanyń baspasóz hatshysy Manar Alıeva, jyl sońyna deıin óner ujymy Tilendıev murasyna arnalǵan birneshe jobany júzege asyrýdy josparlap otyrǵanyn jetkizdi.
ALMATY
