Arqalyǵyna Tarbaǵataıdyń taý-tasy beınelengen oryndyqta dombyrasyn qolyna alyp, Tursynǵazy Rahımov otyr. Júzinen nur tógiletindeı. Kelisti músin 2018 jyly mádenıet qaıratkeri Adaı Azamatovtyń tapsyrysymen jasalǵan. Alaıda ánshi-sazgerdiń músinine Alash arystarynyń izi qalǵan Semeı shaharynan laıyqty oryn tabylmaı tur.
– Eki jyl buryn qala ákimine hat jazdyq. Qor ashtyq. Tursynǵazy Rahımovtyń atyn kóshege berdik. Endigi usynysymyz, Jamaqaev kóshesiniń boıyna óner alleıasyn ashsaq deımiz. Alleıaǵa óner adamdarynyń shaǵyn bıýsterin qoısaq degen de oı bar. Biraq ákimdiktegiler koronavırýsty syltaýratyp únsiz qaldy, – deıdi rýhanııat janashyry Adaı Azamatov.
Al Semeı qalasy ákiminiń orynbasary Aıdar Sadyrbaevtyń aıtýynsha, músin jeke tapsyryspen jasalǵandyqtan oryn áli belgilengen joq. Ony arnaıy komıssııa qaraýy kerek eken.
Komıssııa ýaqyt bólip qashan qaraıtyny, bizge beımálim. Ár kóshesi tarıhtan syr shertetin shejireli shahardan sazgerdiń músinine kórnekti oryn tabý jylǵa sozylatyndaı qıyn sharýa emes sııaqty.
Tursynǵazy Rahımovtyń shyǵarmashylyǵy qazaqtyń án ónerin jańa deńgeıge kóterdi. «Sábı bolǵym keledi» ánimen tanylǵan sazger kóbinese Muqaǵalı Maqataevtyń óleńderine án jazǵan. «Darıǵa, dombyramdy bershi maǵan», «Otyzdan asyp baramyn», «Men seni saǵynǵanda», «Sanaýly kún», «Neni ańsaımyn», «Iа, jaratýshy Allam», «Qazaǵym-aı», «Aıagóz arý» syndy ánderi búkil qazaq dalasyn tebirentken.
Kelesi jyly Tursynǵazy Rahımovtyń týǵanyna 70 jyl. Ataýly dataǵa oraı ánshi-sazgerdiń zamandasy Adaı Azamatov halyqaralyq deńgeıde úlken baıqaý uıymdastyrýdy oılastyryp otyr. Oǵan deıin qala ákiminiń orynbasary aıtqan komıssııa bas qosyp, aqyldasyp, qazaq dalasynda áni áýelegen sazgerdiń daıyn músinin kórnekti orynǵa qoıady dep seneıik.
Semeı
