Qala basshylyǵy jyl saıyn kúz ben kóktemgi laısańda qınalyp qalatyn turǵyndardyń oblys ortalyǵynda trotýarlardy kóptep salý jónindegi ótinishterine oraı qoldan kelgenshe qareket jasaıtyn. Bıyl bul másele de sheshimin tapty. Baǵdarlama sheńberinde qaladaǵy jalpy uzyndyǵy 102 shaqyrym bolatyn 68 kóshege jaıaý júrginshiler jolyn salýǵa respýblıkalyq jáne jergilikti bıýdjetten qarajat bólinip, qyrýar jumys isteldi.
BAQ ókilderin baǵdarlama aıasyndaǵy jumystarmen tanystyrý maqstynda qalalyq turǵyn úı-kommýnaldyq sharýashylyǵy, jolaýshylar kóligi, avtomobıl joldary jáne turǵyn úı ınspeksııasy bólimi baspasóz týryn uıymdastyrdy. Oblys ortalyǵyndaǵy Beıbarys sultan kóshesindegi trotýarlardy "Injenernye ızyskanııa ı K" seriktestigi salypty. Uzyndyǵy 4 shaqyrymnan asatyn jaıaý júrginshiler joly qurylysy jazda bastalyp, osydan onshaqty kún buryn aıaqtalǵan. Qazir jumysshylar aınalasyn tazartyp jatyr.
Trotýardy salý kezinde seriktestik basshylyǵy bastama kóterip, birneshe jerge baspaldaqtar, múmkindigi shekteýli azamattar úshin pandýstar ornatty. Aıaldamalarǵa aparatyn aıaq joldardy da tegin salyp berdi. Kompanııanyń mundaı qaıyrymdylyǵyna onshaqty jyldan beri jol azabyn tartyp kelgen turǵyndardyń aıtar alǵysy sheksiz, – deıdi qalalyq turǵyn úı-kommýnaldyq sharýashylyǵy, jolaýshylar kóligi, avtomobıl joldary jáne turǵyn úı ınspeksııasy bóliminiń basshysy Birjan Dalabaev.
Jumys sapasyn akkredıtasııadan ótken laboratorııa mamandary tekseredi. Bıyldyń ózinde jumysy bitken 6 kósheden kemshilik anyqtalyp, ol merdiger kompanııalar esebinen jóndeldi. Bólim basshysy turǵyndar tarapynan jasalǵan trotýarlardy buzý derekteri de kezdesip qalatynyn jasyrmady. Ásirese, úıler salynyp jatqan aýmaqtarda jaıaýlarǵa arnalǵan joldy aýyr júk kólikterimen kesip ótý oqıǵalary kóp kezdesýde. Osyǵan baılanysty biraz turǵynnnyń ústinen merdigerler qalalyq ishki ister basqarmasyna aryzdanypty.
