Jedel-izdestirý sharalary kezinde buryn-sońdy sotty bolǵan 51 jastaǵy Jarma aýdanynyń turǵyny qolǵa tústi. Kúdikti urlanǵan maldyń etin avtokólikke tıep, Semeı qalasyna qaraı ketip bara jatqan jolda polısııa qyzmetkerleri izin sýytpaı ustap úlgirgen.
"Tergeý kezinde anyqtalǵandaı, kúdikti sharýa qojalyǵynda baqtashy bolyp jumys istep júrgen. Qojalyq ıesi senip tapsyrǵan soń shyǵar, eshkimniń baıqamaı qalatynyn bilgen. Sóıtip, jaıylymda júrgen eki bas jylqyny ormanǵa aıdap aparady. Bireýin sol jerde soıyp, bólingen týshany Semeıdiń bazaryna aparyp satpaq bolǵan kórinedi. Alaıda jospary júzege asyp úlgirmegen", - dedi oblystyq Polısııa departamentiniń bastyǵy Saǵat Mádıev.
Sotqa deıingi tergeý amaldaryn júrgizý kezinde ustalǵan azamattyń taǵy bir mal urlyǵyna qatysy bary anyqtalǵan. Sóıtse, qyrkúıektiń basynda kórshi sharýa qojalyqtan jalpy quny jarty mıllıon teńgege baǵalanǵan eki bas iri qarany qoldy etken. «Buzaýdy urlaǵan ógizdi de urlaıdy» demekshi ekinshi retinde jylqy urlaýǵa kóshken kúdikti kóp uzamady. «Urlyq túbi qorlyq». Atalǵan faktiler boıynsha Qylmystyq kodekstiń 188-1 baby (mal urlyǵy) boıynsha sotqa deıingi tergep-tekserý amaldary júrip jatyr.
Taǵy da esterińizge sala keteıik, elimizde mal urlyǵyna qatysty Qylmystyq kodekske 188-1 baby engizilgen. Naqtylap aıtsaq, mal urlyǵymen aınalysqandar 12 jylǵa deıin bas bostandyǵynan aıyrylýy múmkin. Qarapaıym mal urlyǵyna qatysy bar adamdardy bes jylǵa deıin bas bostandyǵynan aıyryp, múlkin tárkileıdi. Uıymdasqan qylmystyq top 500 AEK-ten joǵary shyǵyn keltirse, úsh jyldan jeti jylǵa deıin abaqtyǵa qamalady. Eger keltirilgen shyǵyn 2000 AEK-ten asyp ketse, qylmystyq top múshelerine 7 jyldan 12 jylǵa deıin jaza kesiledi.
Sondaı-aq jábirlenýshi men kúdiktiniń arasynda tatýlasý bolmaıtynyn da qaperlerińizde ustańyzdar.
