Á.Qasteev atyndaǵy óner mýzeıinde Keńes odaǵynyń halyq sýretshisi, Sh.Ýálıhanov atyndaǵy Qazaq KSR Memlekettik syılyǵynyń laýreaty atanǵan biregeı sheberdiń týǵanyna 90 jyl tolýyna oraı «Meniń Qazaqstanym» atty jeke kórme ashyldy. Ekspozısııaǵa «Kóńildi aldaǵyshtar», «Qazaq eposy», «Sáken Seıfýllındi oqyǵanda», «Qazaqtyń ulttyq oıyndary» sekildi sýretshiniń eń úzdik toptamalary qoıylǵan. Kásibı daryn ıesiniń Qazaqstandaǵy alǵashqy jumysy sanalatyn – «Kóńildi aldaǵyshtar» toptamasynyń akvareldik paraqtary kórermen kóńilin kúlki men ıýmorǵa toltyrady. Onyń basty keıipkerleri – esimderi ańyzǵa aınalǵan dala danyshpandary Aldarkóse men Tazsha bala, Jırenshe sheshen.
«Evgenıı Sıdorkınniń týyndylary qazaq grafıka óneriniń jarqyn betterin quraıdy. Onyń shyǵarmashylyǵyna tán óte joǵary kásibı jáne oryndaýshylyq sheberligi Qazan kórkemsýret ýchılıshesiniń, Rıgadaǵy Kórkemsýret akademııasynyń, I. Repın atyndaǵy Lenıngrad keskindeme, músin jáne sáýlet ınstıtýtynyń bilim oshaqtarynda qalandy. Dáýir únin dál jetkizgen fılosofııalyq máni tereń kartınalardyń ýaqyt ótken saıyn mańyzdylyǵy artyp keledi. Keneptegi ár jaǵys, ótken tarıhymyzdyń qaıtalanbas izi», deıdi mýzeıdiń Qazaqstan beıneleý óneri bóliminiń jetekshisi Kúljazıra Muqajanova.
Aıtalyq, kórme tórinen oryn alǵan «Ǵasyrlar túneginen» toptamasyn Sıdorkın 8 jyl boıy kenepke túsirgen. Atalǵan kartınalar tizbegi – sýretshiniń qazaq halqynyń tarıhy jaıly oılary keıiptelgen qondyrǵyly qoltańbasy. Ol shyǵarmasynda qaqtyǵysqa, qara kúsh pen soǵysqa tabynǵan «qatygez ǵasyr» – feodaldyq ózara tartystar kezeńin tańdap alǵan. Al sýretshiniń Baıqońyrǵa, Temirtaý Magnıtkasyna, Qazaqstan eginshilerine arnalǵan sıýjetteri kirgen «Qazaqstan jerinde» toptamasy jolsapardan alǵan áseriniń kúshimen dúnıege kelipti. Sheber qalamyna iligip, toptama qaharmandaryna aınalǵan qarapaıym jumysshylar men olardyń qońyrqaı tirshiligi kórermendi ótken kúnniń elesimen qaýyshtyrady.
– Sıdorkın shyǵarmasyndaǵy óziniń shuryq-tesik tonyn aıqara ashyp turǵan Aldarkóseniń tapqyr da aılaker júzinde qanshalyqty senim bar deseńizshi. Onyń janyndaǵy saltanatpen sándi kıingen baı músápirleý kórinedi. Keıinirek sýretshi osy toptamany tústi avtolıtografııa tásilinde ekinshi ret oryndaıdy. 1960 jyly ol M.Áýezovtiń shoqtyǵy bıik «Abaı joly» shyǵarmasyn kórkemdeýge aq-qara lınogravıýrany tańdaıdy, arada on jyl ótkennen keıin 1970 jyly ekinshi ret avtolıtografııa tásilinde oryndap shyǵady. О́z dáýiriniń ensıklopedııasy atalǵan osy úlken epopeıadaǵy eń basty oqıǵalardy qamtýǵa tyrysady. Roman birneshe ret oqylyp, Abaı, Toǵjan, Qunanbaılardyń nemese ózge de bas keıipkerlerdiń portretteri sýrettelgen joldar erekshe nazarǵa alynyp, parasat pen fılosofııaǵa toly bolmys-bitimindegi qaıtalanbas obrazdary somdalǵan. Sonymen qatar Sıdorkın romannyń asa mańyzdy tustaryn tańdap alyp («Bazar», «Analar», «Ábish beıitiniń basynda», «Jut»), shyǵarma oqıǵasynyń jáne tulǵalardyń emosııalyq tereńdigin kóz aldymyzǵa elestete alatyndaı keremet aıqyndaǵan, – dep pikir bildirdi ónertanýshy Samal Mamytova.
ALMATY
