Elordanyń irgesindegi Qaraótkel aýylynyń 72 jastaǵy turǵyny Amangeldi Úseıinov beli qatty aýyryp, aıaǵyn basa almaı qalǵan edi. Júrip-turmaq túgili, janyna aýrý batqanda uıqydan da qalady. Adam tózgisiz azapty aýrý aqsaqaldy Ulttyq neırohırýrgııa ortalyǵynyń mamandaryna alyp keldi. Ony ortalyqtyń Julyn neırohırýrgııasy jáne shetki júıke júıesiniń patologııasy bólimshesiniń dárigerleri qarap, pasıenttiń MRT sýretterinen bel omyrtqasynyń degeneratıvti-dıstrofııalyq ózgeristerin anyqtady. Medısına tilimen aıtqanda tórtinshi jáne besinshi bel omyrtqalary arasyndaǵy dıskiniń sol jaq foramınaldy jaryǵy bar bolyp shyqty.
Qarııanyń aýrýyn jáne jasynyń ulǵaıǵanyn esepke alǵan bólimshe dárigerleri omyrtqalardyń L4-L5 dıskisiniń jaryǵyn endoskopııalyq-transforamınaldyq jolmen alyp tastaýdy uıǵarady.
Julyn neırohırýrgııasy bólimshesiniń meńgerýshisi, professor Talǵat Kerimbaevtyń aıtýynsha, bul pasınetke jaryqty alyp tastaý operasııasyn júrgizýdiń ózindik qıyndyǵy bolǵan. Jaryq qol jetýi qıyn jerde ornalasqan eken. Bul jaǵdaıda dárigerler óte jyldam jáne jaraqatsyz, eń bastysy tıimdi emdeý ádisin tańdaıdy. Ádette mundaı oqshaýlanǵan jaryqtar kezinde segmentti ımplantty bekitý jolymen omyrtqa qurylymynyń bóligin alyp tastaıtyn jaraqattaýshy ádisti qoldanatyn. Al bul joly basqasha jol tańdalyp, operasııa ýaqyty bar bolǵany jeti mınýttan astam ýaqytty aldy.
«Biz, neırohırýrgter omyrtqa jáne julyn aýrýlaryn emdeýdiń osyndaı zamanaýı, joǵary tehnologııalyq, kishi ınvazııaly ádisterin qoldaný arqyly operasııa ýaqytyn qysqartýmen qatar emdeý nátıjelerin jaqsartýǵa, sondaı-aq pasıentterdi operasııadan keıin erterek aıaqqa turýyna jáne olardy kúndelikti ómirge qaıta oralýyna múmkindik beretinin esepke alamyz. Sondyqtan operasııa jergilikti anestezııamen, naýqastyń esin tolyq saqtaı otyryp jasaldy. Bul operasııa aıaqtala sala pasıenttiń óz aıaǵyna turyp júrip ketýine múmkindik berdi. Aıta keterlik jaıt, naýqasty alańdatatyn barlyq belgi tolyǵymen joıyldy», deıdi ortalyq mamandary.
Al aýrýynan 7 mınýt ishinde aıyqqan 72 jastaǵy Amangeldi Úseıinov «Julyn neırohırýrgııasy bólimshesiniń dárigerlerine, meıirgerlerine júrekjardy alǵystan basqa aıtarym joq, saýyǵyp kele jatqanyma qýanyshym sheksiz! Osy ortalyqqa kelgende óz aıaǵymmen júre almadym, balalarym meni múgedekter arbasymen alyp keldi. Jıyrma kúnnen astam ýaqyt júre almaý bylaı tursyn, tipti eshqandaı qozǵala almaı qaldym. Qazir aqyryndap júre bastadym, jaqynda úıdegi sharýalarymmen de aınalysa bastaımyn dep oılaımyn. Barlyǵyna shyn kóńilden úlken rahmet!» deıdi aǵynan jarylyp.
