Resmı derekter pandemııanyń kúzdegi soqqysynyń taralý masshtaby kóktemdegiden salmaqtyraq, aýyrlaý bolýy múmkin ekenin aıtady.
* * *
Úndistanda 24 saǵattyń ishinde 55 myń adamnyń vırýs juqtyrǵany anyqtalǵan. Bul týraly eldiń densaýlyq saqtaý mınıstrligi habardar etti.
Eger naqtylaı túsetin bolsaq, bir táýlikte 55 342 úndistandyq aýrý juqtyryp, barlyǵy 7 175 880 azamat COVID-19 vırýsynyń zardabyn tartýshylardyń qatarynda tur.
Elde keshe 706 pasıenttiń tynys-tirshiligi toqtap, pandemııadan kóz jumǵandardyń sany 109 856 adamǵa jetipti. Al aldyńǵy kúni KVI juqtyrǵandardyń 66 732 adam bolǵanyn esepke alǵanda, keshegi 55 myńǵa shúkir aıtýǵa da keletindeı.
* * *
Iran densaýlyq saqtaý mınıstrliginiń baspasóz hatshysy Sıma Sadat Ları 12 qazanda bir kúnde 272 azamattyń COVID-19-dan qaıtys bolǵanyn jazdy.
Baspasóz hatshysy indet kesirinen 28 816 adamnyń kóz jumǵanyn aıta kele, táýlik ishinde vırýs juqtyrý kórsetkishiniń azaımaı turǵanyna qynjylǵan. «504 281 ırandyqqa juqqan vırýstan 409 121 pasıent jazylyp shyqsa, 4 533 jannyń jaǵdaıy kúrdeli kúıde, qarqyndy em alý bólimderinde jatyr», dedi Sıma Sadat Ları.
* * *
Indetten jazylǵan AQSh azamaty bir jarym aıdan soń COVID-19-ǵa qaıta shaldyqty.
«Nebary bir jarym aıdan soń vırýsty qaıta juqtyrý ınfeksııadan adamdy saqtap qala almaıtynyn kórsetedi. COVID-19 vırýsynyń biz bilmeıtin jyqpyldary kóp jáne aǵza men onyń qorǵanysh júıesiniń qalaı jaýap beretininiń de qupııasy mol», deıdi professor Mark Pandorı. Ǵalym ınfeksııadan jazylyp shyqqan jandardyń bir aýyrdym, endi maǵan soqpaıdy dep beıǵam júre bermeýine mán berip, onyń saqtanýdy, qashyqtyq ustaýdy talap etetin aýrý ekenin aıtqan.
BNO News keltirgen aqparatqa sensek, bul – álem boıynsha COVID-19-dyń 2-shi ret qaıta juǵýy.
20 pasıent odan jazylyp shyǵyp, bireýi kóz jumyp, endi ekeýi emdelip jatyr.
* * *
Slovenııada epıdemııa des berer emes. Slovenııa Úkimetiniń baspasóz hatshysy Elko Kasın eldegi epıdemııalyq jaǵdaıdyń nasharlap bara jatqanyna alańdaýshylyq bildirgen.
Elko Kasın áleýmettik jelilerde shynaıy habar taratyp, COVID-19 jaıly halyqqa durys aqparat berip júrgen BAQ pen jýrnalısterge alǵysyn jetkizdi.
Búginde Slovenııa aýrýhanalarynda 172 pasıent jatyr, al olardyń 26-sy qarqyndy emdeıtin arnaıy bólimderde ómir úshin kúresip baǵýda. Indetten 169 slovenııalyqtyń dám-tuzy taýsylypty. Al onyń bar-joǵy 2 mln halqy bar memleket úshin qanshalyqty aýyr ekeni aıtpasa da túsinikti.
* * *
Chehııada densaýlyq saqtaý mınıstri Roman Prymýla 6 adamnan artyq jınalýǵa bolmaıtyny jaıly málimdedi.
«Bul tek jabyq ǵımarat ishinde ǵana emes, dalada da jınalýǵa shekteý qoıyldy degen sóz», degen Roman Prymýla eldegi barlyq mektep jabylyp, sabaqtardyń onlaın júretinin, al balabaqsha jumystarynyń toqtamaıtynyn jetkizdi.
Sonymen qatar mınıstr elde barlyq qoǵamdyq kólik toqtaıtyn aıaldamalarda, perrondar men kútý zaldarynda maska taǵýdy qatań saqtaý qajettigin eskertken. Bul sharalar 14 qazannan bastap kúshine enip, qarashanyń 1-ne deıin saqtalady.
