Rýstam Júrsinov Sarapshylyq keńestiń keńeıtilgen otyrysyna qatysty. Otyrysta oblys kásipkerleriniń birqatar máseleleri, sondaı-aq osy qıyn-qystaý kezeńde bıznesti qoldaýdyń pysyqtalyp jatqan qosymsha sharalary talqylandy.
Keńes otyrysynyń sońynda oblys ákimi Berdibek Saparbaevpen jáne oblys prokýrory Nurǵalym Ábdirovpen Jol kartasyna qol qoıdy. Bıznes-ombýdsmen oblys ákimdigimen, prokýratýrasymen birlesip, kásipkerlerdi qoldaý jáne qorǵaý maqsatynda atalǵan qujattyń árbir tarmaǵyn oryndaý boıynsha barlyq sharalar qabyldanatynyn erekshe atap ótti.
"Eger kásipkerlerdiń quqyqtary men zańdy múddelerin tikeleı qorǵaý týraly aıtatyn bolsaq, 2016 jyldan bastap bıznes-ombýdsmen ınstıtýty 25 myńnan astam ótinishti qarady, olardyń birde-bireýi nazardan tys qalmady jáne turaqty baqylaýda boldy. Onyń ishinde 2020 jyldyń 8 aıynda 3 378 ótinish qaraldy. Bıznes problemalarynyń 70%-dan astamy óńirlik deńgeıde sheshildi. О́tken jyldan bastap oblys ákimderimen Jol kartalaryna qol qoıý tájirıbesi engizilip, onda kásipkerliktiń óńirlik problemalary jáne olardy sheshý joldary kórinis tapty", dep atap ótti Rýstam Júrsinov.
Jambyl oblysy boıynsha 2020 jyldyń 8 aıynda bıznesti qorǵaý jelisi boıynsha 188 ótinish kelip tústi. Onyń 25%-y oń sheshimin tapty. Qorǵalǵan múliktik quqyqtyń jalpy somasy 250 mln teńgeni quraıdy. Bul – kúshi joıylǵan aıyppuldar men ósimaqylar, kontragentterdiń oryndalǵan sharttyq mindettemeleri, qaıtarylǵan múlikter, tyıym salý men habarlamalardyń kúshin joıý. Qalǵan ótinishterge qatysty jumys júrgizilip jatyr.
