Ár aımaqtaǵy atalǵan qurylymnyń negizgi mıssııasy – óńir ómirin tap basý. Al bul maqsattyń údesine jetý úshin qurylymnyń áleýeti men qýatyn arttyrý kerek-aq. Bulaı bolmaǵan jaǵdaıda Qoǵamdyq keńes qoǵamdy izgilendirýge qomaqty úles qosa almasy anyq. Prezıdent Joldaýynda aıtylǵan másele de osyǵan saıady. Osy oıdy nysanaǵa alǵan júzdesýde Memleket basshysy Qasym-Jomart Toqaevtyń 2020 jylǵy 1 qyrkúıektegi Joldaýyn iske asyrý sheńberinde qoǵamdyq baqylaýdy zańnamalyq bekitý máseleleri boıynsha tásilder men usynystar jasaý, sondaı-aq kvazımemlekettik sektorda qoǵamdyq keńester qurýǵa qatysty qoǵamdyq keńester ınstıtýtyn jetildirý jaıy jan-jaqty talqylandy.
Mınıstr óz sózinde qoǵamdyq baqylaý ınstıtýtyn jetildirýdiń der kezinde jasalyp jatqanyn, bul asa mańyzdy ári ózekti taqyryp ekenin atap ótti. Bolashaq zań jobasynyń maqsaty – qoǵamdyq baqylaý júıesiniń quqyqtyq negizin, sondaı-aq azamattyq qoǵamdy odan ári damytý úshin quqyqtyq jaǵdaılar jasaýdy aıqyndaýǵa baǵyttalǵan.
Zań jobasynyń mindetine biryńǵaı uǵymdyq apparatty qalyptastyrý, qoǵamdyq baqylaýdy júzege asyrý qaǵıdattarynyń ortaq júıesin belgileý, sybaılas jemqorlyqqa qarsy kúreste qoǵamdyq kúsh-jigerdi biriktirýdiń quqyqtyq tetikterin jasaý, sondaı-aq qoǵamdyq baqylaý sýbektileri men obektileriniń fýnksııasyn, ókilettigi men jaýapkershiligin aıqyndaý kiredi.
– Memleket basshysynyń Joldaýyna sáıkes kvazımemlekettik sektorda qoǵamdyq keńester qurýdy kózdeıtin, sondaı-aq memlekettik organdardyń, kvazımemlekettik sektor sýbektileriniń memlekettik satyp alý jónindegi konkýrstyq komıssııalarǵa qatysý arqyly qoǵamdyq keńesterdiń ókilettikterin keńeıtetin zańǵa túzetýler ázirlenip jatyr. Búgingi tańda bul túzetýler kelisý rásiminen ótýde. Zańnyń tujyrymdamasy jan-jaqty talqylanyp, pikirler saralaný ústinde, – dep atap ótti Aıda Balaeva.
Qoǵamdyq keńestiń qabyldaǵan kez kelgen sheshimi jel qaýyp qalmaýǵa tıis, degen almatylyq zııalylar jurtshylyqtyń janaıqaıyn tyńdap, aýdandyq ákimdikterdiń qyzmetin qadaǵalap, iri megapolıstiń ósip-órkendeýine serpin beretin máselelerdi máslıhat deńgeıine deıin kóterip júrgenderin aıtady. Al turǵyndardyń talap-aryzy jarty jolda taıǵanap ketpes úshin qurylymnyń qýatynyń artqany durys.
– Sózdiń ashyǵy kerek, elimizde uzaq ýaqyt boıy máslıhattarǵa degen senimsizdik, máslıhattardyń beıqamdyǵy tárizdi máseleler týyndaǵany belgili. Bul týraly kóp syn aıtyldy. Dese de Qoǵamdyq keńester óz rólin atqaryp kele jatyr. О́zindik sıpatqa, ózindik mazmunǵa ıe. Ásirese jańa zań boıynsha máslıhattardyń partııalyq tizimimen jasaqtalatynyn eskerer bolsaq, belsendi azamattarǵa, beıpartııalyq uıymdarǵa qala bıliginiń, mınıstrliktiń jumysyna tikeleı aralasýǵa, qatysýǵa, usynys berýge jaqsy minber, jaqsy múmkindik dep oılaımyn. Qaıta qaralyp jatqan zańnama, Joldaýdan týyndaǵan Qoǵamdyq baqylaý jáne azamattyq petısııalar máselesi bul taqyrypqa tyń serpin bergendeı. Buǵan deıin ulttyq kompanııalar, memlekettiń úlesi bar uıymdar osy kúnge deıin óziniń ishki máselesine qoǵamdy aralastyrmaı keldi. Jańa zań osy máseleni sheshýge de múmkindik beredi. Ulttyq senim keńesiniń alǵashqy otyrysynda da bul taqyryp qaýzalǵanyn bilemiz. Endi kvazımemlekettik kásiporyndardyń kóptegen sharalary óziniń qoǵamǵa jasaǵan shapaǵaty emes, mindeti bolatyn jaǵdaı ornaıdy. Bul óz kezeginde jemqorlyqtyń jolyn kesýge, bıýdjet qarjysynyń durys ıgerilýine septigin tıgizedi, – deıdi saıasattanýshy Aıdos Sarym.
Qazaqstannyń Ǵylymı-bilim berý kompıýterlik jelisin paıdalanýshylar qaýymdastyǵynyń bas dırektory Borıs Japparovtyń sózinshe, Qoǵamdyq keńes tóńiregindegi qordalanǵan máselelerdi jónge keltirýde damyǵan elderdiń tájirıbesine súıengen abzal. Basqosýda sóz alǵan Almaty qalalyq Qoǵamdyq keńesiniń múshesi qurylym quzyretine qala deńgeıinde referendým ótkizý quqyǵy berilse degen pikirin aıtty. О́z mindetin durys atqarmaǵan qala deńgeıindegi laýazymdy qyzmetkerler men máslıhat depýtattarynyń máselesi keńeste qaralsa deıdi ol. Japparov tilge tıek etken mundaı tájirıbe AQSh, Japonııa, Aýstrııa sekildi alpaýyt elderde burynnan bar.
Kezdesý barysynda Almaty qalasy Qoǵamdyq keńesiniń hatshysy, «Aqparattyq – resýrstyq ortalyq» qoǵamdyq qorynyń dırektory Altynaı Kóbeeva, Almaty qalasy Qoǵamdyq keńesiniń músheleri, «KAZBREND» qoǵamdyq qorynyń basqarma tóraǵasy Nurlan Jazylbekov, «Qazaqstannyń daǵdarys ortalyqtary odaǵy» ZTB basqarma tóraǵasy Zýlfııa Baısaqova óz oılaryn ortaǵa saldy.
Is-sharany qorytyndylaǵan Aqparat jáne qoǵamdyq damý mınıstri Aıda Balaeva kezdesýdiń barlyq qatysýshylaryna belsendilikteri men qoǵamdyq iske jaýapty kózqarasy úshin alǵys bildirdi.
ALMATY
