Sýretti túsirgen avtor
Alshańdaı basyp kele jatyp Altaıdyń aq bas asqaryna, quzar shyńdaryna mindetti túrde kóz jiberesiz. Qarap turyp tákapparlyǵyna, sulýlyǵyna tańǵalasyz. Baıqaısyz ba, kóterilip kele jatqan kún jerge shýaǵyn shashpas buryn, aldymen Altaıdyń mańdaıyn jarqyratady. Munshalyqty sulý etip jaratqan qudaıdyń sheksiz qudiretine qaıtip qana bas ımeımiz?!
Qarańyz, samyrsyndy beldeýi ǵana reńin saqtap qalǵan. Etegindegi qalyń jynys myń túrli túske boıalyp úlgergen. Al aıaǵyńyzdyń astyndaǵy jaıqalyp turǵan jasyl shópti bozqyraý shalypty.
Altaıdyń tabıǵatyna qaraı aýa raıy da erekshe. Tóbeńnen kún qazir shaqyraıyp tursa, qazir-aq qara bult torlap, seldete salady. Qyzyq, taýly jerdiń jańbyry da aýyldy alalap jaýady. Kósheniń bir basy laı teńiz bolsa, aıaq jaǵynyń shańy shyǵyp jatatyn.
Ádette kúzdiń jańbyry aptalap sibirleıdi. Kóbinese arty qarǵa ulasyp, jer betin tobyqtan aq ulpa basady. Tús qaıta etektegi qar erigenimen, taýdyń basy miz baqpaıtyn. Osymen aýylǵa qys túsip qalmasyn bilesiz. О́lara ýaqyt. Keıbir jyldary qazannyń ortasyna qaraı kún qaıta jylynyp, mızamshýaqtanady. Kún kózi shyǵyp turǵanmen, ózen-kólderdiń jıekterine qabyrshyqtana muz qatar edi. Kúzdiń shýaqty kúni ári ketse eki aptaǵa sozylady. Bir kúni daýyl turyp, altynǵa malshynǵan aǵashtardy jalańashtaıdy. Súreń tartqan qara kúz degenińiz sol edi. Arǵy jaǵynan qylyshyn súıretip qys kele jatady.
Shyǵys Qazaqstan oblysy
