Qysqy mezgilde úıdi nemese ǵımaratty jylytý úshin gaz jaǵý aıryqsha saqtyqty qajet etedi. О́ıtkeni gaz jaǵý kezindegi salǵyrttyq órt nemese ýlaný qaýpin kúsheıte túsedi. Jyl basynan beri óńirde ýly gazdan ýlaný saldarynan eki adam jaraqat aldy. Tabıǵı gazben ýlanýdan qaza bolý sebebi – gaz qazandyǵyn ornatý jáne paıdalaný kezinde órt qaýipsizdigi erejelerin saqtamaýdan týatyny belgili.
Mańǵystaý oblysynyń barlyq eldi mekenderi ortalyqtandyrylǵan gazben qamtamasyz etilgen. Sondyqtan gazdy qoldaný erejelerin úıretip, saqtyq sharalaryn saqtaýdy talap etý oblys boıynsha júrgizilýi tıis. Oblystyq tótenshe jaǵdaılar departamenti qyzmetkerleri órttiń aldyn alý jáne adamdardyń ýly gazben ýlanýdan qaza bolýy men jaraqattanýyn boldyrmaý maqsatynda halyqpen turaqty túrde órt qaýipsizdigi qaǵıdalaryn túsindirý jumystary júrgiziledi. Bul – jylytý maýsymyna daıyndyq kezeńiniń basym baǵyttarynyń biri. Departament jergilikti atqarýshy organdarmen birlesip, halyqtyń áleýmettik osal toptarynyń 3 myńnan astam úıin esepke aldy, onyń ishinde barlyq úıler aýlalardy aralaýmen qamtyldy.
– Reıdter nátıjesinde 648 úıde 749 órt qaýipsizdigi talaptaryn buzý anyqtaldy. Aıta ketý kerek, buǵan deıin buzýshylyqtar anyqtalǵan úıler aǵymdaǵy jyldyń 1 qarashasyna deıin qaıta tekserilip, 398 úı qamtyldy. Al halyqtyń áleýmettik osal toptarynyń turǵyn úılerin qospaǵanda, departament qyzmetkerleri 8 myńnan astam adamdy qamtı otyryp, 3 myńnan astam aýlany aralap shyqty. О́rt kezinde durys minez-qulyq daǵdylaryn damytý maqsatynda 240 oqý ornynda 14 myńnan astam oqýshyny qamtı otyryp, 28 ınteraktıvti jáne ashyq sabaq ótkizildi, – deıdi oblystyq tótenshe jaǵdaılar departamentiniń basshysy Qýanar Bazarbaev.
Jumys aýdandar men qalalarda jalǵasyn tabýda. Mańǵystaý aýdany Tótenshe jaǵdaılar bóliminiń №8 О́SB jeke quramy «QazTransGazAımaq» qyzmetkerlerimen birlese jylytý maýsymynyń bastalýyna baılanysty Shetpe aýylynyń irgesindegi Ashybulaq aýylynda ornalasqan turǵyn úılerge «Qazaqstan-Aqtaý telearnasynyń» qatysýymen órt qaýipsizdigin saqtaý maqsatynda túsindirý jumystaryn júrgizdi. Profılaktıkalyq jumys barysynda 2 072 adamdy qamtıtyn 441 turǵyn úıdi aralap, birqatar qatelikterdi anyqtady. Mysaly, 31 úıde jylytý peshteri úıdiń ishinde ornalasqan bolsa, 14 úıde aýa aınalatyn jeldetkishtiń bolmaýy, 21 úıde jylytý peshteriniń qasynda janǵysh zattar qoıýǵa jol berilgeni syndy 66 buzýshylyq anyqtaldy.
Túsindirý jumystary kezinde TJB qyzmetkerleri, jylý peshteriniń durys ornalasýy qajettigin, balalardy jalǵyz qaldyrmaý kerektigi jóninde, elektr qurylǵylaryn paıdalaný kezindegi órt qaýipsizdigi erejelerin, óńirdegi kóp taralǵan órttiń shyǵý sebepteri jáne onyń saldaryn kórsete otyryp, órt qaýipsizdik talaptaryn saqtaý qanshalyqty mańyzdy ekenin túsindirdi. «Saqtyqta qorlyq joq» degendeı, qaýipsizdik sharalaryn aldyn ala júrgizip, saqtana bilgenge ne jetsin?!
Mańǵystaý oblysy
