Máselen, pandemııa kúshine engen mezgilde Qaraǵandy oblysynda 10 376 adam indettiń ınfeksııasyn juqtyrǵan eken. О́kinishke qaraı, osy keseldiń kesirinen 279 naýqas ómirden ótip ketti. Al karantındik shekteý sharalarynan ekonomıkamyzǵa kelgen shyǵyndy oılasań, tóbe quıqań shymyrlaıdy.
Koronavırýstyń bolý yqtımaldyǵy tym joǵary ekinshi tolqynyna toıtarys berý úshin oblysta qazirgi ýaqytta qyzý daıarlyq júrip jatyr. Mysaly, 19 qazannan bastap Qaraǵandy oblysy boıynsha 8 sanıtarlyq beket qoıylmaq. Bul týrasynda jergilikti Saryarqa telearnasynda ótken brıfıngte oblystyq Taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń mindetin atqarýshy Iýrıı Zalygın málimdedi.
Mundaı qadamǵa barýǵa kórshi oblystardaǵy jaman tumaý juqtyrǵandar sanynyń ósip bara jatqany túrtki bolǵan eken. Sol sebepti, endi oblystyń Jezqazǵan, Prıozersk qalalary men Ulytaý, Nura, Osakarov, Buqar jyraý jáne Qarqaraly aýdandarynyń kireberisine sanıtarlyq beket qoıý jóninde sheshim qabyldanǵan. Bul jerlerde polısııa men medısınalyq qyzmetkerler júrgizýshiler men jolaýshylardyń densaýlyq jaǵdaıyn tekserip, kúni-túni kezekshilik etetin bolady. Buǵan qosa, qalalarda kópqabatty turǵyn úılerdiń kireberisteri, lıftiler men parkıngter táýligine kem degende eki márte profılaktıkalyq dezınfeksııalaýdan jáne ylǵaldy tazalaýdan ótkiziledi. Balalar men aýla alańdary da kún saıyn dezınfeksııalanady. Jasy 65-ten asqan egde adamdarǵa qozǵalysty shekteý usynylady. Shtatynda 30-dan astam adamy bar memlekettik kásiporyndar men uıymdarda qyzmetshilerdiń 50%-y qashyqtan jumys isteý formatyna kóshirilýi tıis. Shetelge shyǵatyn týrıstermen aqparattyq jumysty kúsheıtý talap etiledi. 50 adamnan astam otyratyn orny bar saýda-oıyn-saýyq ortalyqtarynda, saýda úılerinde, jelilik dúkenderde, qoǵamdyq tamaqtaný oryndarynda beınekameralar ornatý usynylǵan. Mundaı qadam ereje buzýshylyqtardy naqty ýaqyt rejiminde tirkeý úshin kerek. Sondaı-aq ónerkásiptik kásiporyndarda, avtovokzaldar men avtobeketterde stasıonarlyq teplovızorlar men aqyldy beınebaqylaý júıelerin ornatý talap etiledi. Jolaýshylar kóligine júktemeni tómendetý maqsatynda kásiporyndar men uıymdardyń saralanǵan jumys kestesi boıynsha másele sheshiletin bolady. Budan bólek, ónerkásiptik kásiporyndardyń basshylary óz qyzmetkerlerin jumysqa jáne úıge jetkizýdi uıymdastyrýy kerek. Karantın tártibi osylaısha qatańdaǵan kezde eriktiler zeınetkerler men múmkindigi shekteýli jandarǵa kómek kórsetý jumystaryn jandandyrady. Maskalyq rejimniń, sanıtarlyq-dezınfeksııalyq talaptardyń saqtalýyn baqylaý kúsheıedi.
Brıfıng barysynda oblystaǵy bas sanıtarlyq dárigerdiń mindetin atqarýshy oıyn-saýyq, sporttyq, otbasylyq, eske alý, saltanatty jáne basqa da buqaralyq is-sharalardy ótkizýge tyıym salynǵanyn taǵy bir márte eskertti. Al karaoke, bılıard, kompıýterlik klýbtar, túngi klýbtar, boýlıng ortalyqtary sııaqty oıyn-saýyq mekemeleriniń, sonymen qatar jabyq úı-jaılardaǵy balalar oıyn alańdary men attraksıondarynyń, batýttardyń, jabyq ǵımarattaǵy kınoteatrlardyń, býkmekerlik keńselerdiń jumys isteýine áli de ruqsat etilmegen. Iý.Zalygın óńir turǵyndaryn sanıtarlyq talaptardy qatań saqtaýǵa shaqyrdy.
– Vırýs áli de qaýipti. Úıden qajet bolmaǵan jaǵdaıda shyqpańyzdar, kópshilik jınalatyn jerden aýlaq bolyńyzdar, áleýmettik qashyqtyq pen maska rejimin saqtańyzdar, – dedi ol.
Al Qaraǵandy oblystyq densaýlyq saqtaý basqarmasynyń basshysy Erjan Nurlybaev koronavırýstyń bolýy múmkin ekinshi tolqynyna degen óńirdegi daıarlyqtyń qalaı órbip jatqanynan tolyq málimet berdi.
– Oblysta koronavırýs ınfeksııasynyń jańa tolqynyna qarsy kúres daıarlyǵy keń aýqymda júrgizilýde. Mysaly, Jezqazǵan qalasynda jańadan salynǵan 200 tósektik juqpaly aýrýlar aýrýhanasy naýqastardy qabyldaýǵa daıyndalýda. Ol modýldik tásilmen salynǵan jáne zamanaýı medısınalyq jabdyqtarmen qamtamasyz etilgen. Qarasha aıyna qaraı Abaı, Balqash, Temirtaý jáne Shahtınsk qalalarynda juqpaly aýrýlar aýrýhanalaryn qaıta qurý jáne jóndeý aıaqtalady, – dedi oblystyń bas dárigeri.
Qazirgi ýaqytta oblys boıynsha 160 naýqas em-dom alyp jatyr. Kún saıyn 5-6 adamnan jaman tumaýdyń belgisi tabylady. COVID-19 naýqastaryna arnalǵan tósektik qor ázirge bar-joǵy 4%-ǵa ǵana tolyqqan kórinedi. Búginde óńirdegi aýrýhanalardy zamanaýı medısınalyq tehnıkamen jabdyqtaý jalǵasýda. Atap aıtqanda, 223 О́JJ, 2400 ottegi konsentratory, 2600 pýlsoksımetr, 40 sıfrlyq rentgen apparaty satyp alynǵan. Sondaı-aq medısınalyq gazdardy berýdiń ortalyqtandyrylǵan júıeleri ornatylady. Mobıldi brıgadalar qosymsha kóliktermen qamtamasyz etilgen. Kompıýterlik tomograftar parki kúsheıtilýde. PTR-zerthanalar jelisi keńeıýde, onyń qýaty táýligine 10 myń testke deıin ósetin kórinedi.
E.Nurlybaev egde adamdar toby úshin vırýstyq ınfeksııanyń maýsymdyq kóterilýi kezeńinde emhanaǵa barýdyń qajeti bolmaıtyndaı jaǵdaı jasaýdyń amaldary qarastyrylatynyn aıtty.
– Qart adamdarǵa medısınalyq qyzmetterdiń kópshiligi úıde kórsetiletin bolady. Dıspanserlik esepte turǵan barlyq pasıentter qańtardy qosqandaǵy aldaǵy úsh aıǵa qajetti dári-dármek qoryn alady, – dedi ol.
Sonymen birge oblystyń bas dárigeri tumaý men pnevmokokk ınfeksııasyna qarsy vaksınalaý naýqany aıasynda 200 myńǵa jýyq adamnyń tegin ekpe alatynyn jetkizdi.
Budan sál buryn oblys ákimi Jeńis Qasymbek apparat jıyndarynyń birinde koronavırýstyń kelesi tolqynyna qarsy daıarlyqtyń jaı-japsaryn talqylaı kelip: «Merekeler, toılar, mereıtoılar tosa turady. Týystar men jaqyndarymyzdyń ómiri men densaýlyǵy áldeqaıda mańyzdyraq», degen bolatyn.
Resmı derekterge sensek, oblysta koronavırýstyń ýytyn toıtarýǵa qajetti dári-dármektiń jetkilikti qory jasalǵan syńaıly. Medısınalyq mekemeler men shıpagerler qaýymy tóngen qaýipti bes qarýy túgel saı qarsy alýǵa daıyn degendi de jıi estımiz. Olaı bolsa, endigi jerde jaman tumaýdyń bolý yqtımaldyǵy tym joǵary dep júrgen ekinshi tolqynyn yqtyrýdyń bir joly kóp jaǵdaıda turǵyndardyń «Saqtansań – saqtaımyn» degen qaǵıdatty tereń uǵynǵan sanasy men túsinigine baılanysty bolmaq.
Qaraǵandy oblysy
