Aqqýlardan taraǵan aýrý

Alǵashynda qus tumaýyna qatysty karantın elimizdiń 7 oblysynda, 78 eldi mekenine engizilgen edi. Bul týraly Aýyl sharýashylyǵy mınıs­trligi veterınarlyq baqylaý men qadaǵalaý komıteti tóraǵa­sy­nyń orynbasary Tursyn Qabdoldanov málimdegen.

Al Besqaraǵaı aýdanynda shyqqan qustardyń indeti alǵash 30 qyrkúıekte tirkelipti. Veterınar mamandarynyń aıtýynsha, mundaǵy qus tumaýy aýylǵa jaqyn mańdaǵy kólge ushyp kelgen aqqýlardan ta­raǵan sııaqty. Baskól aýyly­nyń mańynda úlkendi-kishili kólderden 200-ge jýyq aqqý ushyp-qonyp jatatyn. Indet budan ári taramaýy úshin aýyl azamattary men veterınar sa­la­synyń mamandary úr­kitip, ushyryp jibergen. Qazir­gi ýa­qytta jeti-segiz aqqý ǵana júr.

Aýyl sharýashylyǵy mınıs­trligi veterınarııalyq baqylaý jáne qadaǵalaý komıte­tiniń Bes­qaraǵaı aýdandyq aýmaq­tyq ınspeksııasynyń basshysy Erenǵaıyp Tabyl­dınniń aıtýynsha, aýyldaǵy qustarǵa vaksına egildi. Tumaý kóbinese qazdarǵa juqqan. Úı qustarynyń júristeri shal­qalaqtap, dene qyzýlary kó­te­rilgen. Al úırek pen ta­ýyqtardan mundaı belgi baı­qalmady. Ázirshe aýyldaǵy qustardyń barlyǵy qamaýda. Qus­tardy veterınarlar únemi qadaǵalaýda ustap otyr. Aýyl­­dyń bas-aıaǵyna beketter qoıylyp, 18 adam kúni-túni jumys isteýde.

– 28 qyrkúıekte Aýyl sha­rýa­shylyǵy mınıstrligi vete­rınarlyq baqylaý jáne qa­daǵalaý komıtetinen aýyl­daǵy qustardy shyǵarmaı, qamaýda ustaý týraly nusqaý kelgen. Sol nusqaý negizinde aýyl tur­ǵyndaryna eskertý jasaldy. 29-30 qyrkúıek kún­deri kólge jaqyn úılerdiń qus­tarynan aýrý belgileri baıqalǵan. Úsh qaz ólip, 11 qaz­dan patogendik qus tumaýyna kúdik týǵan. Habar túse sala kól mańyndaǵy úsh úıdiń qu­synan synama alynyp, Nur-Sultandaǵy veterınarııalyq ulttyq referenttik ortalyqqa jiberildi. Zerthana nátıjesi oń belgisimen 2 qazanda keldi, – deıdi Besqaraǵaı aýdandyq aýmaqtyq ınspeksııasynyń basshysy E.Tabyldın.

Qaýiptiń órship ketpeýi úshin kól jaǵasyndaǵy 6 úıdiń 201 bas taýyǵynyń, qaz-úıreginiń kózi joıylǵan. Oǵan ótemaqy tóleý-tólemeý máselesi jer­gilikti bıliktiń quzyrynda. Eger ákimdiktegi sharýashylyq kitabynda qustardyń tizimi bolsa, shyǵyn óteletin kórinedi.

Búgingi tańda Baskól aýylynda respýblıkalyq epıde­mııaǵa qarsy otrıadtyń maman­dary jumys júrgizip jatyr. Aýdanda jalpy sany 25 myń­nan astam qusqa ekpe jasaldy. Al karantınniń qashanǵa deıin jalǵasary belgisiz.

Shyǵys Qazaqstan oblysy

Besqaraǵaı aýdany